E-government mal ehecuta ta mal propaganda pa servicio digital

Segun Gregory Bronswinkel

“Oma y Opa a registra caba pa vacuna riba e App of e website di DVG? Pasobra Oma y Opa por hacie riba cel of riba computer, e ta facil!”

“Ma mi yiu, nos no tin computer, y nos no sa con pa hacie riba cel tampoco, con nos ta haci awor?!”

Na Aruba nos tin varios websites y portalnan online di Gobierno. Algun di esakinan ta: Aruba Health App di DVG, BO Impuesto di SIAD, DIMAS su e-registracion, DPL su e-registracion, MiSVB di SVB y algun otro portalnan online. Mayoria di esakinan ta traha riba nan mes y no ta conecta cu otro sistemanan di Gobierno.

Esaki lamentablemente ta ensera tardansa, falta di eficiencia di haña informacion necesario di un departamento pa otro.

Gobierno mester ta consciente cu nan no por permiti y nan no tin e recursonan tampoco pa ta “proefkonijn” pa cu ideanan incompetente of agendanan sin sentido, manera votamento y conteo electronico.

Ora di considera e balor berdadero di e plataformanan digital aki, dos pregunta cu ta esencial ta:

1. E plataformanan digital aki ta haciendo e bida di tur nos hendenan mas facil y mihor?

2. E plataformanan digital aki ta haci cu e departamentonan di Gobierno ta duna mihor servicio, ta traha mas eficiente, y cu responsabilidad pa cu e ciudadanonan cu nan ta sirbi?

Mescos cu Oma y Opa, hopi otro hende no tin e manera ni conocimiento tecnico pa atende cu e sistemanan digital aki. Esaki ta treciendo hopi mas stress den e comunidad y den e temponan dificial aki di Covid.

Alabez, cuanto biaha ta bel e departamentonan aki pa ayudo y no ta haña contesta, of ta haña un answering machine, of ta keda 10 minuut ta warda y tin cu sera, perdiendo placa di gasto di telefon y tempo?

Tecnologia ta conoci mundialmente como un di e toolsnan di mas poderoso y esencial pa desaroyo inovativo, social y economico. E desaroyonan aki ta necesario, pero nan mester ta sostenibel pa un bon gobernacion y pa calidad di bida, segun Gregory Bronswinkel.

Pero con nos lo por haci uzo di e oportunidadnan cu e plataformanan digital aki ta presenta?

Gobierno tin mester di campeonnan pa maneha y implementa un vision tecnologico, sostenibel y inovativo. Pero mester pensa bon riba locual ta traha den nos mesun cultura y cu ta satisfice nos necesidadnan. E ora nos lo mester selecta cu cuidao y siña di nos mesun conocimiento, experiencia y tambe di otro profesionalnan.

Bottom Line

Con e plataformanan digital actual na Aruba ta afectando e calidad di bida y e derechonan humano di nos

ciudadanonan? Paso awendia, hopi hende nan bida ta draai rond di e plataformanan digital aki. Hopi di nos ta biba, siña, traha y hunga tecnologia. Abilidad tecnico y un comunidad inovativo ta crucial pa logra yega na un pais cu un bon economia y desaroyo sostenibel.

Pa nos por tin exito pa cu e desaroyo inovativo aki, nos mester tin un fundeshi solido di confidencialidad, integridad y disponibilidad.

Sinembargo, si e sistemanan aki no ta facil pa tur hende por traha cu nan, ainda ta vulnerabel pa hackers, cu e riesgo y peligro pa nos privacidad y derechonan, nos mester corda, “Sopi pura ta sali salo!” y nos no mester ni pensa ariba votamento y conteo electronico prome cu nos rescata nos economia, segun Gregory Bronswinkel.