Gabinete Wever Croes a cay for di dialuna, Confrontacion y falta di respet entre Minister y Parlamentario determinante

Ayera merdia e noticia cu a conmove mundo politico sin duda, tabata e decision di Prome Minister y lider di MEP, Evelyn Wever Croes di bay cerca Gobernadora pa entrega retiro di su Gabinete.

Un hecho cu tin algun tempo caba andando, kisas hasta algun aña of lunanan ya cu e ‘chemistry’ cu mester tin den un coalicion na cabes di e pais, no tabata existi nunca.

Algo mas cu logico ya cu for di momento cu e tres partidonan a dera cabes pa laga partido AVP cu a gana eleccion for di Gobierno, tabata un pacto haci den fierno, ya cu ta enemigonan grandi di otro, a dicidi  di bay uni y trata di goberna e pais manera cu nan a haci’e.

Un pacto den cual no tabatin confiansa ningun dia, ya cu na momento cu acusa un politico di ta un di esann mas corupto cu e pais a yega di conoce pa despues dicidi di brasa e mesun politico simplemente pa sinta den un Gobierno, ta mas cu claro cu e final ta loke a pasa ayera tardi.

Pa di tantisimo bes dialuna atardi lider di fraccion di RED, Ricardo Croes a dicidi di acusa su propio Gobierno di cosnan cu no ta bon, di entre otro cu Minister Dangui Oduber lo ta suministrando un vacuna cu no ta bon segun e lider politico y cual situacion a conduci na un confrontacion mahos den Parlamento.

Dado momento Ricardo Croes a dicidi di bandona sala di reunion y den un declaracion pafo di Parlamento, el a cataloga Minister Dangui Oduber como un persona arogante y fresco cu no tin respet pa su persona.

Ayera mainta ex lider di MEP y ex Prome Minister Nelson Oduber a dicidi di sali na defensa di su yiu Minister Dangui y for di e momento ey caba, tabata circulando e rumor cu Gabinete Wever Croes tabata riba su ultimo momentonan.

Den seno di e Gobierno, principalmente cerca esnan di partido MEP, e presion a bira mas grandi pa core cu partido RED for di Gobierno, pero no tabatin un solucion adecuado cu no ta di entrega retiro di e Gabinete.

Algun ora despues, den oranan di mainta a drenta e participacion di Ministerio Publico cu a inicia un investigacion relaciona cu e fundacion di fraccion di POR, Hunto cu partido POR, caminda lo tin malversacion cu a tuma lugar, caminda cierto suma di placa lo a bay un caminda, sea riba un cuenta bancario of otro caminda, cu no t’esun corecto.

Prome Minister no a duda ningun momento pa dicidi di bay Gobernadora pa baha su Gobierno, confirmando e hecho cu e tempo pa su Gobierno bay cas tabata simplemente pa haya e mihor ocasion pa haci esaki.

Ayera MEP a logra un triunfo politico riba partido RED y su lider Ricardo Croes caminda no a duna e partido aki e oportunidad pa baha Gobierno, pero awor t’e partido mas grandi a haci esaki y awor tin cu spera riba e fecha nobo pa eleccion tuma lugar.

Eleccion lo wordo adelante y dentro di tres luna lo mester tuma lugar un eleccion pa un Gobierno nobo manera ta prescribi.