Homber deteni diadomingo, dialuna bek den libertad y ta bolbe wordo deteni pa no sigui ordo di autoridad

Dialuna den oranan di atardi, un patruya di Polis na Pos Chikito ta topa cu e Toyota Rav4 shinishi coriendo un biaha mas hopi iresponsabel, pasando auto y treciendo asina trafico na peliger.

Mesora e patruya di Polis a cende su sirena y a duna e chauffeur di e Rav4 ordo pa para, pero manera ya ta su custumber e no ta respeta ordo di autoridad. E patruya mesora a pidi refuerso y a cuminsa cu un persecusion.

E chauffeur di e Rav4, diadomingo mainta a wordo deteni na altura di Mangel Halto Bar, pa motibo cu ta for di diasabra merdia e tabata keda burla di Polis y durante Toque de Queda, e tabata keda subi caya y core hopi iresponsabel rond, te cu un patruya di Polis a accidenta durante den oranan di madruga, durante un di e varios persecusionnan su tras.

Mientras refuerso tabata na caminda e persecusion a start na Pos Chikito n’e caminda patras te cu Barcadera, unda el a lora y drenta un caminda di santo. Aki e chauffeur a para e auto y a bay na pia. El a drenta den mondi pa sconde pa Polis. Aki ta caminda cu Polis a rondona e mondi y asina a logra pone man riba e chauffeur aki.

Un biaha mas el a wordo deteni y hiba Warda di Polis y su auto a wordo confisca. Diadomingo mainta el a wordo deteni caba pa motibo cu for di diasabra merdia e tabata keda burla di autoridad. El a wordo poni den libertad, pero no a siña su les.

Un biaha mas el a bolbe subi tras di stuur y sigui core iresponsabel. E homber aki tras di stuur ta forma un peliger pa trafico y sigur no tin un clase di respet pa autoridad.

No lo ta nada straño cu mañan e ta bek den libertad, ta bolbe sigui burla di autoridad y e mas pio ta cu e ta trece trafico na peliger.