Monumentenbureau a celebra su di 25 aniversario

Recientemente Monumentenbureau a celebra nan di 25 aniversario. E departamento a bay Misa na unda pastor di Misa di Oranjestad a bendiciona cada empleado. Alabes a bay un reunion cu nan Minister di Cultura sra. mr. Xiomara Maduro na unda a celebra e aniversario.

Gobierno a institui dia 1 di januari 1996 por medio di un decreto gubernamental un Bureau cu e nomber Monumentenbureau. A cuminsa elabora den un espacio chiquito den Centro Educativo  Cristian y despues di un luna a muda na Maria Convent den e hala na Dominicanessestraat.

Monumentenbureau a cuminsa crece y na juni 1997 a muda pa Zoutmanstraat 1. Na aña 2001 a muda pa Schelpstraat 36-38 na unda e departamento ta hubica te ainda.

Monumentenbureau durante aña a crece y asina tambe nan tareanan. Na 1996 Monumentenbureau tabatin tres persona den servicio. Na 2013 Monumentenbureau a worde restructura y a bira un departamento y su formacion a bira 15 funcion.

Actualmente tin 11 funcion yena y tin 4 vacatura. E cambio grandi na 2013 tabata cu e departamento mes a cuminsa pinta mapanan di restauraccion y Monumentenbureau mes ta haci e direccion y supervision ora e proyecto ta wordo ehecuta.

Monumentenbureau tabatin diferente Minister y nan ta: Sra. dr. L. Beke-Martinez, sr. T.F. Lee, sra. M. Hooyboer-Winklaar, sr. O. Oduber, sr. mr M. Eman y nos Minister actual ta sra. mr. X. Maduro. Monumentenbureau tin un solo director desde 1996 te actual cu ta sra. ing. Yvonne Webb-Kock.

Monumentenbureau kier a haci uso di e oportunidad aki pa gradici Minister sra. mr. Xiomara Maduro pa tur su apoyo cu nos ta ricibi. Tambe Monumentenbureau kier gradici Monumentenraad, ex coleganan y tur otro departamento di Gobierno p’e colaboracion ricibi, arkitectonan y nan consehero, companianan di construction y nan subcontratistanan y un tur cu a contribui den nan manera na Monumentenbureau.