Na lugar di manda Friends & Family cas a dicidi di reduci cuido medico cu 5 miyon pa luna

Na luna di januari ultimo, e organisacion di dokternan di cas, esta HAVA y tambe Respaldo a dirigi un carta na Tweede Kamer, buscando aclaracion of solucion riba e hecho cu den e acuerdo conoci como Landenpakket, cual a wordo firma pa Prome Minister Evelyn Wever Croes, tin como un di e condicionnan cu mester reduci un suma di 5 miyon  pa luna den e sector di cuido medico.

Un suma cu bira 60 miyon pa aña cu ta un suma considerabel y e organisacionnan menciona ta kere cu e suma aki lo bay percura pa problemanan serio den e sector di cuido y cu tur consecuencia cu esaki lo trece duna p’e interes general di salud di pueblo.

Gobierna y Parlamento a sinta cu tur instancia concerni caminda Prome Minister Wever Croes a informa cu su Gobierno lo bay dialoga cu esnan den cuido medico, lo bay dialoga pa yega na un forma con ta bay atende cu e asunto aki, mientras cu Minister Presidente ta bon na altura cu ya no por cambia nada mas riba e acuerdo aki.

Secretario di Estado di Salud, Bienstar y Deporte, a dirigi e preguntanan di HAVA y otro organisacionnan di Aruba pa haya claridad riba e preguntanan aki y aki Secretario Raymond Knops a bolbe confirma pa di tres ocasion caba, cu e organisacionnan aki, tin cu busca claridad y splicacion cerca e propio Minister Presidente di Aruba, esta Evelyn Wever Croes.

Knops ta bolbe mustra cu henter e pensamento aki, e medida desproporcional aki, a sali for di mente di Prome Minister di Aruba y cu ningun momento e medida aki ta algo cu Gobierno di Reino a impone riba pueblo di Aruba.

Ya caba Knops a yega di bisa na dos ocasion anterior cu e reduccion den presupuesto di cuido medico, ta algo di Gobierno di Aruba y asina mes Prome Minister ta pretende di informa e organisacionnan den cuido medico, cu ainda tin espacio pa dialoga pa mira si lo yega na un solucion y realmente no ta bay tin solucion riba e asunto aki.

Tur cos ta mustra cu Prome Minister kier cumpli cu exigencianan di CFT y Gobierno di Reino pa reduci gastonan di Gobierno, pero na lugar di manda hende cas, manera cu el a priminti, Prome Minister ta prefera di reduci gasto pa cuido medico cu manda su hendenan cas, un total di mas cu 300 hende  sin tuma na consideracion cuanto daño esaki lo causa na hendenan den necesidad di un mihor cuido pa nan salud.

Aki un biaha mas ta keda demostra cu Friends & Family ta wordo previlegia prome cu interes di pueblo ya cu e 60 miyon aki cu ta spaar den e sector medico, lo wordo registra como reduccion di gastonan di Gobierno cual sin duda lo bay tin su consecuencianan pa hopi hende y no por confia cu lo bin cambio den esaki, ya cu e acuerdo ta firma caba y Prome Minister lo laga e asunto aki den man di e proximo Gobierno cu lo tuma mando despues di eleccion na luna di september proximo.

Awor ta Secretario di Estado, Raymond Knops ta confirma cu ta Prome Minister Evelyn Wever Croes mester ta sincero cu pueblo, cu  e pais ya  cu no ta forma pa hunga e tipo di weganan aki, pa trata di tuma henter un pueblo haci di kens djis pa sirbi su interesnan politico.