OM a laga pone beslag riba fondonan di POR, relaciona cu posible iregularidadnan den fondo di POR

Algun tempo pasa a drenta un asina yama MOT melding (Melding Ongebruikelijke Transactie) na Ministerio Publico. E lo ta trata di iregularidadnan referiente maneho di placa riba un cuenta bancario di un fundacion di fraccion di POR den Parlamento di Aruba.

Riba ordo di Procurador-General esaki a wordo investiga mas aleu dor di Landsrecherche di Aruba y esey a hiba na un sospecho di malversacion.

Mirando cu e placa riba e cuenta aki ta forma parti di fondonan publico y Ministerio Publico kier evita cu e placa aki lo desaparece di un manera of otro, a pone beslag riba algun cuenta cu te n’e momento aki a aparece den e investigacion. Landsrecherche lo sigui haci investigacion. Pendiente e investigacion Ministerio Publico lo no duna mas informacion tocante e contenido di e investigacion y e personanan envolvi of marca como sospechoso. Te aki e publicacion di Ministerio Publico.

ANALISIS

Analisando e declaracion aki di Ministerio Publico, sin kier bay den detayes di e caso, ta indica cu e sospecho ta cu e Fundacion Asina si POR, cu ta cu e placa cu e fundacion ta haya pa cubri su gastonan di e fraccion den Parlamento.

Aparentemente tin indicacion cu partido POR ta usa e fondo aki, pa e.o. labamento di placa. Maske cu Alan Howell, kende ta encabesa lista di POR no kier bay den detayes y a limita na bisa pa laga Ministerio Publico haci su investigacion.

Di acuerdo cu Howell, accountant, tesorero, abogado di POR ta atende e insinuacionnan aki.
POR a bin ta cumpli cu reglanan di e.o. entrega di su relato anual di partido, despues di eleccion.