Recientemente Rotary Club Aruba a haci AWG. 67.000 na donacion na diferente instancia den comunidad

E situacion di Covid-19 y tur medida cu a wordo tuma dor di Gobierno a haci cu no tabata posible pa organisa actividadnan di fundraising den e manera usual. Dor di esaki Rotary Club Aruba mester a cancela Fiesta Rotaria di 2020 y 2021. Tambe e Golf Tournament cu semper ta tuma lugar na fin aña mester a wordo adapta n’e “normal nobo” cu Covid-19 a trece cu ne. Apesar di esaki Rotary Club Aruba ta keda haci tur loke ta posibel pa sigui duna un man na diferente instancia den nos comunidad.

Recientemente directiva di Rotary Club Aruba a haci donacion di total di AWG 67.000 cual a wordo reparti bao di e siguiente instancianan:

  • Fundacion Ajudo na Aruba (FANA)

FNA ta prepara paketenan di cuminda (custom-made) pa famianan den necesidad y cu tin yiu(nan) di menos cu 4 aña. FANA ta yuda 400 famia pa siman.

  • Stichting Sonrisa/Stichting Trampolin pa Trabao

Sonrisa /Trampolin pa Trabao ta traha cu personanan special. Stichting Trampolin pa Trabao tin un programa di “job coach” pa personanan cu disabilidadnan. E donacion ta pa sostene ambos organizacion den nan operacion.

  • Stichting Casa Cuna Progreso

Casa Cuna ta un cas pa muchanan entre 0-8 aña cu (temporalmente) no ta biba na cas y ta duna guia na e mayornan. Cu e donacion di ricibi, Casa Cuna por renoba e systema electrico di e facilidadnan pa asina segura un ambiente sigur y continuo. Un danki special ta bai na ACE Firm Engineering cu gratuitamente a contribui pa analisa e situacion di e systema electrico y a duna sosten durante ehecucion di e trabaonan.

  • Fundacion Hende Muher den Dificultad (FHMD) awor bao nomber di Fundacion Contra Violencia Relacional

FCVR ta brinda sosten y guia na victimanan di violencia domestico. Donacion a bai via CEDE Aruba cu a guia e proyecto y ta pa yuda cu compra di muebleria pa e proyecto di facilidad di un shelter nobo. Fondonan pa e donacion aki a bin di e Torneo di Golf di Rotary Club Aruba di december 2020.

Den e momementonan dificil cu nos isla ta pasando aden ta importante pa por brinda e ayudo aki na instancianan cu mas mester di dje p’asina yuda nos comunidad surpasa e retonan aki positivamente. Rotary Club Aruba kier a gradici pueblo di Aruba y su colaboradornan p’e sosten continuo, hasta den momentonan mas dificil. Esaki realmente ta demostra e confiansa cu comunidad tin den nos organisacion y ta duna tur miembro e energia pa sigui haci e trabou aki.