Ricardo Croes (MEP) ta bandona reunion y Prome Minister no a ripara mes

Betico Croes den felis memoria, a yega di haya confrontacion cu otro politico conoci cu ta Benny Nisbet y kende recientemente tambe a fayece, y un observacion cu a bira masha conoci di Betico n’e lider di PPA tabata: “Los perros ladran y la caravana pasa” y e observacion aki t’esun mas corecto pa splica tur loke a pasa den sala di Parlamento dialuna merdia, ora cu a tene un ‘bijeenkomst’ relaciona cu Covid-19.

Un confrontacion entre Minister di Salud, Dangui Oduber y e lider di partido RED y miembro di fraccion aki den Parlamento, Ricardo Croes, cual confrontacion tabata di spera mirando e forma con e lider di RED a cuestiona henter e proceso di vacunacion di Minister Oduber entre otro  insistiendo cu e no ta confia e vacuna cu Gobierno a trece Aruba.

Ta di tantisimo bes cu Ricardo Croes ta cuestiona e maneho di un Gobierno cu su persona a bin ta sostene for di 2017 caba, pero caminda nunca el a tuma un posicion cu cual e ta sirbi interes di pueblo y no di un Gobierno cu e mes ta considera malo y cu e plan di vacunacion no t’esun corecto.

Awor bisando cu e vacuna aki no ta corecto, bisando cu su persona lo no presta su mes nunca p’e tipo di weganan politico aki, weganan populista, Ricardo Croes ta hortando su mesora cu apesar di tur e gritonan sensacionalista aki, ta sigui sostene e mesun Gobierno aki y Minister Dangui Oduber cu e no ta confia cu e vacuna.

Despues cu Ricardo Croes a dirigi su preguntanan na Minister Oduber, cos a cambia na momento cu e Minister a lanta para pa contesta e preguntanan di e lider di RED, kende aparentemente no tabata mucho na gusto cu tanto e tono y e forma con e Minister a dirigi su mes na su persona.

Mesora a surgi un intercambio di palabra cu a bruha tur cos y dado momento Minister Dangui Oduber a bisa Parlamentario Croes: “Mi a laga bo papia, awor sinta laga ami papia. Duna mi oportunidad pa contesta loke bo a puntra sin cu bo ta sapatia. Sinta bo rustig, sinta keto y eynan y laga mi contesta bo preguntanan,” pero aki e lider di fraccion di RED a dicidi di ruim op su documentonan y a bandona e reunion lagando tur hende atras.

Den declaracion na prensa na parti dilanti di Parlemento, Ricardo Croes a mustra cu e Minister a papia c’un tono arogante y casi ofensivo caminda e no ta mira e balor agrega pa sinta scucha Minister Oduber papia cu su persona mescos cu ta c’un mucha chikito e ta papiando.

Fuera di esey e lider di RED a mustra cu e Minister no sa cu kende e ta papia ya cu su persona ta un “wetenschapper”, caminda na mes momento el a reta Minister Oduber pa mustra ki diploma e tin of ki scol el a caba ya cu segun e parlamentario, e Minister lo no tin mesun nivel di educacion manera su persona, insistendiendo cu su persona a studia ley, pues e ta un ‘wetenschapper’  y cu e kier mira diploma di Dangui como wetenschapper.

“Mi ta un wetenschapper y mi kier pa Minister mustrando cu e ta un wetenschapper”, Ricardo Croes na Dangui Oduber.

Otro punto cu a hala atencion ayera tabata ora cu Prome Minister Evelyn Wever Croes, kende a atende e reunion aki y tabata den sala ora cu Ricarrdo Croes a bandona sala, el a declara na prensa cu e no a ripara mes cu esaki a sosode, ya cu e tabata masha “druk” bezig, haciendo kico, ningun hende sa ya cu ta Minister Dangui Oduber t’esun cu mester a hiba palabra. Otro scenario cu realmente ta confirma cu pueblo di Aruba tin un Gobierno cu ta parce un circo, caminda no tin ni confiansa den maneho cu Ministernan di e tres fraccionnan ta hibando y tampoco tin respet pa otro, ya cu na momento cu ta considera un Minister cu bo ta sostene como un persona arogante, esaki ta bisa mas di e lider di RED cu di e Minister mes.