YMCA a keda cla cu nan plan di implementacion di Codigo di Proteccion

Diabierna 26 di maart 2021, sigur tabata un momento di orguyo y alegria, na momento cu YMCA Aruba a resulta di ta e prome stakeholder cu a entrega su plan di implementacion di Codigo di Proteccion.

Tur stakeholder den e veld grandi social a haya e ‘modelopzet’ di e implementacion di Codigo como tambe tur informacion y presentacion necesario pa ta completamente ekipa pa traha nan plan di implementacion.

E rond di consulta cu e lider di proyecto, Efraim Suurendonk, a haci den e veld social a keda completamenta cla, cu excepcion di dos instancia: Imelda Hof y Bureau Traimerdia, cu ta poni pa sosode den e dianan benidero finalmente.

E stakeholders mester yena e pasonan di Codigo den e plan di implementacion pa nan instancia y asina garantisa y salvaguardia seguridad y bienestar di tur mucha cu ta cay bou di nan auspicio.

Den e proximo simannan, lider di proyecto lo bolbe acerca tur stakeholder pa sa con leu nan ta cu e plan di implementacion di Codigo.

Tambe lo cuminsa cu e di dos workshop/training p’e 76 Centronan di Cuido cu a haya e prome training den luna di october y november 2020. Den e workshop lo duna atencion n’e Codigo un bes mas cohuntamente cu Fundacion Famia Planea, Fundacion Pa Nos Muchanan y Fundacion Respetami, unda lo enfoca riba diferente tema relaciona cu e pasonan di Codigo di Proteccion; educacion sexual, reconoce e señalnan di abuso sexual di menor y mas. Lo haci uzo di caso real p’asina e participantenan por aplica e pasonan di Codigo di Proteccion, haciendo uzo di SofS y asina nan por haya un mihor bista, con lo mester anda cu e pasonan di Codigo. E workshop/training aki lo tuma lugar den luna di mei y pronto veld di Centro di Cuido lo cuminsa haya tur informacion y inscripcion.