A bakuná komo 12.000 persona di edat riba 60 aña

WILLEMSTAD. E kantidat di siudadano ku a keda bakuná di e edatnan riba 60 aña ta alrededor di 12.000 na Kòrsou.

Dòkter Jerry Semper a hasi un yamada na un i tur pa djòin den e guera kontra di un enemigu invisibel, komo tal el a pidi ku énfasis pa sigui e instrukshonnan, esta keda kas, mantené distansia, laba man, bisti tapa boka i registrá pa tuma e bakuna.

Kategórikamente dòkter Jerry Semper a rechasá e ponensia ku e bakuna ta kontené ingredientenan ku ta fomentá e malesa.

Doktrinanan religioso tampoko no ta sirbi e kousa aktualmente, pasobra ta e mesun “Papa Dios” ku a pèrmití pa siensia logra e bakuna kontra di Covid 19, dòkter Jerry Semper a sigui splika. Señor Daniel Oleana a bini na palabra pa splika algun asuntu logístiko relashoná ku e sitio di bakunashon.

Tur esnan ku tin un palabrashon hasí na Anna Paviljoen, entrante djasabra mester bai na e poliklínika di Hospital Sint Elisabeth.

Tambe a bini na palabra un señora den representashon di Sambil pa splika ku e sentro komersial aki ta duna su full koperashon ya ku lo kumbiní hinter e komunidat di Kòrsou pa mas pronto posibel yega na resolvé un di e problemanan mas serio ku komunidat di Kòrsou ta konfrontando kuné aktualmente.

Dòkter Jerry Semper a garantisá ku e sistema di telefon ni Internèt lo no konhelá, pasobra a amplia e kapasidat, pone tur kos na un nivel aseptabel, entre otro a tuma mas telefonista den servisio.

Un kambio importante ta sinta den e hecho ku personanan ku entrante djaluna awor registrá pa e bakuna i ku pasa e promé angua, mester warda 5 pa 6 siman pa risibí e siguiente angua di bakuna.

Esaki ta debí ku tur prioridat ta konsentrá riba duna e promé bakuna na tur hende. Kòrsou komo komunidat chikitu tin e bentaha di por resolvé e problema aki rápidamente ku bakunashon. Una bes ku bakunashon ta e solushon, den kaso ku miembronan di nos komunidat pasa e bakuna aki den un tempu kòrtiku, e malesa lo resultá bou di kòntròl di manera ku bida por normalisá den un tempu rekòrt.