Exitoso conferencia virtual di ATCA

E siman aki a tuma luga e di 30 edicion di Annual Tourism Conference Aruba (ATCA) via e platforma online YouTube.

Esaki a sosode diamars dia 30 di maart unda parti merdia a habri e conferencia cu e Himno di Aruba, canta y toca dor di e conocido Etty Toppenberg.

Despues Director di A.T.A. p’e mercado Norte Americano, Ed Malone a dirigi palabra di bonbini na tur participante y a wordo comparti entre otro e importancia di ATCA pa cu e mercadeo di turismo procedente di Norte America cu ta nos mercado principal.

Presentacion cu mensahenan clave di CEO di A.T.A. Ronella Croes, CMO di A.T.A. Sanju Luidens-Daryanani y Tisa LaSorte CEO di AHATA a wordo comparti. Ademas e participantenan a wordo presenta cu e ultimo desaroyonan di Aruba Airport Authority dor di CEO di AAA Joost Meijs y AAA Airline Service Dev. Mgr. Jo-Anne Arends.

Tambe a comparti mensahenan bon cla cu tur e actualisacionnan-rekisitonan cu Aruba ta exigi di un bishitante prome cu nan yega nos isla pa disfruta di nan vacacion. No obstante cu –debi n’e pandemia- tin hopi restriccion p’e biahero – esaki no a stroba pa sigui produci y yama bonbini n’e bishitantenan cu a scoge nos destinacion pa pasa nan vacacion.

Entre otro por a mira presentacionnan pa cu Media Strategy di e Director di Digital Marketing pa A.T.A. Norte America, Lea Giaquinto, Communications & Messaging di The Concept Farm (advertising agency pa Aruba) pa medio di su Director Gregg Wasiak, y di The Zeno Group (PR agency pa Aruba) por a mira presentacionnan di Maureen Murray pa cu Relacionnan Publico y Katie Rie cu a papia di Social & Influencer Marketing.

Finalmente Kim Riddle kende t’e A.T.A. Business Dev. & Sales Mgr. pa Central US a presenta un sales update pa cu e mercado di Norte Americano.

KICO TA ATCA?

ATCA t’e Annual Tourism Conference Aruba cu ta dirigi riba e mercado di Norte America y ta un di e conferencianan mas importante pa cu Aruba su turismo procedente for di e Area di Norte America.  ATCA su obhetivo, ta pa brinda posibilidad pa reforsa e conocimento di Aruba n’e ehecutivonan y pa sigui traha riba e relacionnan cu e socionan, enfocando asina riba oportunidadnan cu por enrikece nos mercado turistico. Debi n’e situacion actual, ATCA a wordo teni digital via a plataforma YouTube.

RECUPERACION DI NOS TURISMO

Durante su presentacion, Ronella Croes a laga sa cu e plan pa 2021 ta pa recupera e total di bishitantenan pa nos isla entre 45% pa 60% y mescos tambe pa loke ta trata e tourism credits (loke e turista ta laga atras den nos economia) cu 45% pa 60%. Tambe pa loke ta turismo crucero ta pa recupera esaki entre 25% pa 50%. Tur compara cu 2019.

E aña aki tabatin un total di 156 participante registra, di cual 20 di nan ta companianan di operadornan di tour cu ta conta cu un total di 38 participante.