Historia politico ta wordo scirbi cu retiro anhela di Gabinete Wever Croes

Evelyn Wever Croes como Prome Minister di pais Aruba, a crea algo di historia den e mundo politico di e pais, ora cu el a dicidi di bay Gobernador y entrega retiro di su Gabinete.

Personalmente Evelyn ta bay den historia no solamente como e prome dama cu a bira Prome Minister di e pais, pero tambe e prome Prome Minister dama cu ta bay den historia pa baha su Gobierno sin cumpli cu e mandato completo, segun su persona pa motibo di falta di integridad di su partner den coalicion.

E partido historico ta sigui den e famia Croes mes ya cu Minister Glenbert Croes cu e decision tuma diamars di manda Gabinete Wever Croes cas, ta bira e unico Minister cu nunca a cumpli c’un periodo completo di gobernacion, ya cu  esaki ta su di tres ocasion cu Glenbert ta bay cas sin completa un termino completo.

Den pasado na dos ocasion Glenbert mes a yega di tumba Gobierno di coalicion y awor un biaha mas no ta su persona a tumba e Gobierno aki, pero ta Tanchi Evelyn a haci esaki ya cu nan no por traha cu hendenan cu ta falta integridad.

Esaki ta bira tambe e prome Gabinete cu ta bay cas usando e excusa di integridad, confirmando cu e lider di MEP ta mira e punto di integridad, como un di e puntonan principal cu lo bira tema di e campaña di su partido.

Otro punto historico a wordo reserva pa Minister di Husticia Andin Bikker, kende den menos di cuater aña, ta bandona dos partido politico, di cual el a yuda funda tur dos y aparentemente e lo ta preparando pa subi lista di partido MEP y ta mas cu claro cu el a bira lomba pa Howell despues di a duna e homber un partido perdi caba, pa awor trata di recupera confiansa cu el a perde den eleccion di 2017 despues cu e mes a bandona su partido Democracia Real.

E unico cambio cu Bikker lo conoce awor si e bay riba lista di MEP ta cu e no mester funda otro partido nobo pa cumpli cu su soñonan como politico ya cu e lo haya tur cla pa su persona caba y e gran pregunta ta cu si e lo haya un posicion halto riba e lista geel si e wordo acepta.

E ex miembro di fraccion di POR, esta Dellanire Maduro, tambe a marca historia ora cu el a bira e prome Parlamentario di historia di politica di pais Aruba, cu a dicidi di declara su mes independiente hasta prome cu e Gobierno cu e ta sostene, a bira demisionario y mas ainda sin cu el a bishita Gobernador pa informa Su Excelencia di su decision.

Pues durante cu Gabinete ta cayendo den oficina di Gobernador, Dellanire mes a tira un tipo di coup ora cu el a dicidi di distancia su mes for di fraccion di POR y cu e lo sigui como miembro independiente den Parlamento.

Na prome instante hopi e kere cu su distanciamente tabatin di haber cu reglanan di DVG, pero a bin resulta cu awor ta Howell awor a wordo converti den un pandemia di falta di integridad,  caminda tur hende di POR a core bay lague su so para, realmente y totalmetne su so.

Ta bin acerca cu pa loke t’e miembronan den Parlamento cu a sostene e Gobierno di coalicion, a termina posiblemente nan prome y unico periodo como Parlamentario ya cu riba e proximo lista di MEP ta di spera cu e actual Ministernan di e partido geel, lo drente bek den Parlamento despues di eleccion y ta depende di nan posicion riba lista como tambe e cantidad di voto personal cu nan lo ricibi, con ta nan futuro politico despues.