Kòrsou ta bai subi e kantidat di bakunashon ku ta duna pa dia

WILLEMSTAD – Ayera gobiernu di Kòrsou pa medio di minister Zita Leito a anunsiá ku ta bai pasa over pa duna bakunashon na tur siudadano, pasobra e situashon aktual ta un hopi serio. Entrante djaluna tur siudadano di 18 aña bai ariba por yama pa registrá nòmber na telefon 9345 òf inskribí via Internet via www.bakuna.cw pa tuma e bakuna.

Ademas tur persona ku ta ehersé un funshon vital entrante awe djarason 31 di mart por hasi meskos. Funshonnan vital ta: Kuerpo Polisial i LBD, agentenan polisial, Brantwer, esta trahadónan di kuerpo di bombero, trahadónan di Wardakosta, Milisia i Curmil, milisianonan; téknikonan di Aqualectra, responsabel pa e ret di awa i elektrisidat; UTS, Flow i Digicel, kendenan ta responsabel pa e ret di komunikashon; Personal i klientenan di SDKK, wardadónan di prezu, personal di siguridat na aeropuerto, Air Traffic Control, Servisio di Seguridat di Kòrsou (VDC), miembronan di Auana i Imigrashon, Miembronan di inspekshon di MEO, Miembronan di Inspekshon Laboral, dosentenan, maestronan i lidernan di krèsh, trahadó i kolaboradornan di supermarket i minimarket, trahadónan na pòmp di gasolin, shofùrnan di konvoi, bus i di taksi, miembronan di e Tim Stratégiko i e Crisis-team, Banko Sentral, Personal di Seguridat di Haf, y Ministernan i Parlamentarionan (tambe esnan ku pronto lo drenta Parlamento).

Pa ilustrá kon serio e situashon aktual ta e minister a referí na e kantidat di kontagionan ku a subi drástikamente, mortonan ku a kai komo konsekuensia di e malesa i finalmente e hecho ku komo minister e mes a tuma nota di personal di ambulans ku mester presentá na kasnan di famia pa buska i transportá pashènt, bistí a la estilo di astronout pa ta sufisientemente protehá kontra di e malesa.