Lesnan y workshop di pintamento na Cosecha

Den luna di april Cosecha tin dos diferente actividad di pintamento pa publico. Na Cosecha Oranjestad e artista Erika Moran ta cuminsa cu su lesnan di pintamento di 4 siman. Na Cosecha San Nicolas e artista Laureen Eman ta ofrece un workshop di paint pouring.

Erika Moran ta ofrece conhuntamente cu Cosecha un curiculo di lesnan di pintamento. E artista local Erika a siña arte den exterior y ta duna les pa mas di 15 aña. Durante di e lesnan aki cu ta pa principiante, e participante ta siña con pa usa y domina diferente pintura di acrylic, awa y azeta, con pa usa sombra y lus den bo pintura y mucho mas.

E les di pintamento ta tuma lugar riba 4 diasabra, cu ta 10, 17 y 24 di april y 8 di mei.  Por registra pa e les di 10.00 am – 12.00 pm of di 1.00 – 3.00 pm. Edad pa por participa ta 10 aña bay ariba. E lesnan aki ta tuma lugar na Cosecha Oranjestad.

Laureen Eman ta conoci pa su arte di paint pouring y esaki ta un tecnica cu a bira popular e ultimo tempo. Durante e workshop aki e artista local Laureen ta siña e participante tecnicanan basico pa por crea piesanan unico. Delaster dia pa registra ta 8 di april.

E workshop aki ta di 12.00 – 2.00 pm y e prijs ta inclui material y bebida refrescante. Edad pa por participa ta 15 aña bay ariba. E workshop aki ta tuma lugar na Cosecha San Nicolas.

Ta importante pa sa cu durante e actividadnan creativonan na Oranjestad y San Nicolas tur precuacion di higiena y seguridad lo wordo tuma en conexion cu Covid-19.

Pa mas informacion por tuma contacto cu Cosecha Oranjestad na telefon 5878709. Tambe por manda un email na cosechaworkshop@gmail.com.