Mundo ta ariba un cruzada, cual pais y con ta bay lidera?

Pa: Gregorio Wolff

E ultimo simannan tabatin encuentronan interesante relaciona cu nos futuro riba e planeta aki y sigur ariba e liderazgo. Mi ta menciona 3 encuentro.

  1. E Summit na Alaska entre USA y China:
  2. E prome conferencia di prensa di Presidente Biden;
  3. E encuentro di e Bilderberg Group na Montreux.

Mi  ta cuminsa cu e grupo Bilderberg unda como 120 lider di mundo derechista ta reuni.

E grupo Bilderberg a nace na inicio di e añanan 50 di siglo pasa, a base di un invitación di Prins Bernhard, na un grupo grandi selecta for di mundo capitalista na Europa-Occidente y di Norte-America n’e hotel De Bilderberg, na Oosterbeek. Apesar cu e reuniónnan ta tuma lugar otro caminda awor, e nomber Bilderberg Group a keda.

E intención tabata pa estrecha lasonan entre politico y gruponan derechista di Europa y Norte-America, siguiendo e hermandad di e plan Marshal y di Nato, organisacionnan cu a caba di lanta na final di añanan 40 di siglo pasa politiconan renombra di Merca y di Europa, entrenan semper lídernan  di e Partido Laboral na Gran Britania. Tambe e representantenan di Nato, lidernan di multi-nacionalnan semper ta asisti n’e reunionnan anual, manera t’e caso e siman cu a pasa n’e ciudad Montreux, Zwitserland.

E reunionnan no tin notulanan, ni na final ta saca comunicado. Pero sigur tin consensus eyden y cual sigur ta bay cay riba lesenaarnan di lidernan político na Merca y na Europa Occidente.       

E topiconan semper ta bay riba con pa fortalece e capitalismo, awendia yama e neo-liberalismo, e política anti-comunista, antes anti-soviético, awor anti-Russia y anti-China.

Papiando cu esnan cu a atende e reuionnan aki, nan ta bisa cu no ta intención pa trece un Gobierno mundial neo-liberal, pero na mesun momento nan ta bisa cu esey ta un bon meta pa logra. 

E prome conferencia di prensa di Biden

Diahuebs siman pasa Biden a tene su prome conferencia di prensa, cu miembronan di prensa selecta. Su ponencianan tabata specialmente contra China cu acusacionnan contra e  Presidente Xi di China, igualmente loke e ta pensa di Putin. Según Biden nan no ta democratico y a acusa e lider Chines di ta autocratico, mientras Biden  si ta democratico. Tur den e estilo di Donald Trump y di acuerdo cu frasenan di guerra friu. Mas patras tin e partimento di mundo den uno democatico y e otro auto-cratico.

E Summit na Alaska entre USA y China.

E encuentro aki no a trece nada nobo, acusacionnan di USA y tambe acusacionnan di China.

Merca ta acusa China di ta maltrata muslimnan na China y China a mustra riba e discriminacion di hendenan di color manera nos conoce, Black Lives Matter, tambe e mas cu 2 miyonnan di muslim, kendenan a muri a consecuencia di e invasionnan di paisnan Arabe dor di USA. Tambe tabatin otro acusacionnan bay y bin, di un pais contra e otro pais, pero nada di acuerdo riba un tema.

E unico acuerdo cu por ser saca for di e summit aki ta: Cu tur presente n’e Summit a bay di acuerdo cu no tin acuerdo riba ni un tereno.

DEEP-STATE od Dark-STATE  na USA.

Mi ta menciona e parti aki, pasobra hopi ta papia di dje, otronan ta bisa cu e no ta existi.

Pero berdaderamente e mester ta existi. Pa loke ta su definicion tin varios splicacion.

Esun cu mi persona, hopi hende y instancianan ta bisa ta cu Deep-State of Dark-State na USA ta un network consistiendo di personanan representando: companianan priva, specialmente for di e industria di arma, otro gruponan di interes, Think-Tanks, partido democraat y partido conservador, pero cu un participacion hopi menos compara cu e partido democraat, medianan manera WAPO (Washington Post) MSNBC, New York Times. Empleadonan Publico halto mara n’e gruponan di interes.

Tur cu e mesun interes p’e sistema neoliberal

Tur ta gruponan cu no por eherce control riba nan, y nan ta funciona como un Gobierno riba e Gobierno oficial, manera tabata e caso algun tempo pasa. Riba e prome dia, como Presidente, Obama a firma un decreto pa sera e prison na Guantanamo. Nada no a sosode y ta ser bisa cu Deep-State a para tur cos.

Otro ehempel, e caso cu Gobierno di Trump poco tempo pasa a tuma desicionnan cu ta bay termina e “Endless Wars” na medio oriente.

Gueranan cu según expertonan a costa USA mas di 7 triyon di dolars ( US$ 7.000.000.000.000). Deep-State of Dark-State a para duro y tur cos a keda mescos.

USA, un imperio den decadencia cu hopi fayo

USA, un imperio decadente y bayendo atrás, cu parce ta cana cay, lanta y bolbe cay, enfrentando un futuro insigur. 

Merca e pais poderoso te cu poco tempo pasa, pero ta demostra masha hopi debilidad ultimo tempo.

No tin un infrastructura social, nan sistema di salud no tabata prepara pa combati un pandemia. USA t’e pais cu a ricibi mas sla compara cu tur pais na mundo, for di Covid-19, mas hende a contagia y mas morto a cay, causa dor di Covid-19.

Un seguro medico adecua, lubida y compara cu nos na Aruba cu e joya cu yama AZV, nan ta basta atrasa. Mi no ta papia di conocemento di medicina y preparacion di specialistanan, eynan USA ta top. Pero banda di 50 pa 60 miyon de hende no tin un seguro medico. 

Discriminacion contra hende di color ainda ta fuerte. Un infra-structura general bieu cu su hopi defectonan. Sistemanan moderno cu speed pa treinnan na USA ainda ta riba Tekentafel, mientras na China, Hapon y Europa e ta algo normal pa hopi tempo caba, cu speedrail.

Den mesun bril bieu por wak e proposicion di Biden siman pasa na Prome-Ministro di Gran Bretania, Boris Johnson pa nan inicia un sorto di e Belt and Road di China cual a inicia na 2013 y ta funcionando tremendamente.

Biden kier un iniciativa similar, pero di estadonan democratico.

MAGA y RAL ta nifica cu USA a perde e liderasgo na mundo

Ora nos analisa loke ex Presidente Trump y actual Presidente Biden tabatin y tin como nan principal lema di campaña:

  • Trump,  MAGA (Make America Great Again)= haci Merca grandi di nobo;
  • Biden, RAL, (Restore American Leadership) = Restaura e liderazgo  di Merca.

E dos personanan aki, uno cu tabata Presidente recien di USA y e otro actual Presidente di USA, tur dos nan propaganda tin e nificacion  cu ya China a avansa pa bira e lider na mundo.

Mientras Biden a bisa siman pasa: “China tin un meta pa bira e lider di mundo, e pais mas rico di mundo y esun mas poderoso di mundo, pero esey no ta bay pasa, ya cu Merca ta sigui crece y expande den mundo”.

E palabranan “expande den mundo” por bira e problema grandi, pasobra esey ta nifica e factor militar y aki sigur Merca ta mas poderoso.

Aki tambe e politica di Deep-State of Dark-State ta bay ricibi su balor. Nos ta sinti’e tambe for di e palabranan cada biaha di e Minister di Asuntonan Exterior, Blinken, cu hopi hende ta wak como un exponente di Deep-State.

Maske ta bon pa menciona cu e desaroyonan nobo di misilnan Chines y Rusiano  cu por haci hopi daño y haci e tecnologia bieu y poderoso cu ta parti grandi di  e forsa militar di USA absolete

Pues ora nos analisa e situacion actual e ta hopi peligroso. Pakico, pasobra e liderasgo di mundo ta den discusion. USA pa hopi aña a lidera mundo cu cosnan bon, pero tambe cu su hopi cos malo, sigur e docenanan di ocupacion y intervencionnan militar di paisnan na mundo, aserca e politica di boycot y sancionan cu su violacionnan di derechonan humano  contra paisnan,  den e ultimo 75 añanan.

Mientrastanto nos tur sa cu casi tur producto cu tabata bin di USA awor ta bin for di China, cu excepcion e parti di armanan. A pesar di t’e prome productor di arma, Merca a perde e bataya economico y China ta aparece awor como e pais cu mas industria y cu un producion masivo.

Pa casi tur pais na mundo, tambe pa USA, e productonan Chines, a bira indespensabel.

China tambe a saca como 800 miyon di hende for di pobreza e ultimo 30 añanan

E cambio ta bin

Hopi ta yama e situacion actual e Trampa de Tucidides. Tucidides tabataun militar di Athena na Grecia, el a filosofia hopi riba e hecho ora un potencia nobo surgi y ta reta e potencia estableci. Esaki sigur ta crea un campo di bataya of guera.

Pues awe nos ta wak e acenso=subimento di China como e maximo potencia tecno-economico.

E splicacion di MAGA di Trump y RAL di Biden ta nifica cu e guera economico ya ta perdi.

Tambe ta bisto un choque di cultura y di interesnan, sigur conforme e crecemento di China pa ser e maximo economia na mundo.

Por bisa tambe cu berdad aki a inicia e era di desorden. E guera economico y sancionnan di Trump contra China ta demostra esaki, igualmente por wak con sancionnan y boycot contra paisnan amigo di China/Russia a surgi den e era di desorden.

E union China cu Russia ta resultado di e atakenan di Merca contra Russia y China. USA a crea dos enemigo grandi cu e consecuencia cu nan a uni.

Conferencia di prensa  di Biden

Biniendo bek n’e conferencia di prensa di Biden den su conferencia di prensa e tambe a bisa This moment is an inflection point,”  Según Biden nos ta mei-mei di un debate fundamental riba e direccion di nos mundo.

E ta bisa tambe cu USA ta den e mihor posicion. Esaki ta nifica cu mester brasa y reclama  nos bentahanan solido y aserca mundo for di un posicion di confiansa y di poder. Si nos haci esaki hunto cu nos partnernan democratico, USA por deal cu tur reto y surpasa nan. Hunto nos por construi atrobe y mihor.

E hecho cu USA mester reclama su bentahanan solido ta nifica cu nan a wordo perdi.

Tambe su ponencia cu USA ta un “indispensable nation” ta algo artificial ya cu hopi pais no ta acepta USA mas como e lider mundial.

USA ta un di e paisnan mas poderoso na mundo, pero e posicion ey ta wordo reta dor di China. China riba varios tereno ta igual na USA, riba otro terreno, e ta mihor.

China ta opera eficientemente den un mundo multi-polar. Por bisa cu Russia, Brazil, India y EU tur ta existi como polarnan real y nan comercio ta funciona independiente di USA.

E multipolaridad no ta aceptabel na USA pa su mundo politico, pero cu nan t’e unico superpower na mundo no ta relevante mas, e lemanan MAGA y RAL a papia idioma cla.

Biden a parti mundo den 2 atmosfera

Pesey Biden den su conferencia di prensa  a papia di un mundo parti den 2,  e parti democratico  lidera pa USA  y e parti autocratico cu China na cabes.

E alternativo pa politiconan ta pa regresa n’e idea di un mundo bi-polar di cual USA ta na cabes di e partnernan neo-liberal y democratico pa hiba e bataya contra e forsanan auto-cratico di China y Russia. Pues pa Biden e democracianan liberal ta bon y dentro di e autoritarismo  tin e forsanan malo.

Hasta Biden a bisa cu den futuro nos nietonan por haci un tesis cual lo gana: E autocracia of e democracia. Biden a bira tur cos, e a bisa cu no ta e posicion di  China frente USA pa loke ta e liderasgo di mundo ta den discusion pero ta e caminda cu nos lo scoge, uno pa bon of e otro pa malo.

E realidad di un mundo bi-polar tambe ta evidente pa otro paisnan  na mundo.

Pues e parti positivo cu Biden a papia den su conferencia di prensa ta e retiro di Merca di ta e poder global y  di e rol nobo di lider basa ariba un notion mas colegial, di autoridad mundial comparti.  E pais ta sigui existi como un entidad independiente, pero e ta nifica un fin na e realidad di USA cu nos ta conoce awendia. Un pseudo poder imperial unda su relevancia ta basa ariba un hegemonia global imponi, cual no por sigui existi.

Si e conferencia di prensa di Biden tabata prome cu e summit na Alaska, e resultado di e summit tabata otro.

Como conclusion nos mester conclui cu  USA tin 3 tres opcion awe:

  1. No haci nada y accepta cu China ta bay bira e pais lider na Mundo;
  2. Merca ta bay negocia cu China pa e cambio sosode den un forma mihor y ordena, hasta por hinca Nacionnan Uni den e discusionnan pa e cambionan sosode mas trankil, pa duna hopi balor na e parti social, nihila e militarismo y caba cu e era di desorden na mundo.
  3.  Bay den un guera mlitar cu China

Opcion 3 sigur ta un di e ideanan cu ta sali for di Deep-State o Dark-State.

Esaki tur hende di bon boluntad lo rechasa, pasobra sigur e  ta bira un guera nuclear y cual lo nifica e fin di sernan humano.