Vakantie a yega…. Con bo yiu lo pasa su tempo?

Awor cu muchanan tin vakantie por ta bo yiu ta anticipa caba con e lo pasa su tempo liber: mira television y drumi tur dia laat!
Aunke cu vakantie ta pa hende por relaha, esaki no kiermen cu mester laga tur reglanan di cas bay. Ta importante pa purba wanta bo n’e schedule normal di drumi di bo yiu. Apesar di tur cos bo tambe mester di tempo pa bo por bin bij di bo dia.

Si un mucha drumi laat tur anochi y su mainta siguiente e no ta of no kier drumi largo pa recupera e soño cu el a falta, e por cuminsa sufri di falta di soño cronico. Mucha bou di 6 aña tur dia tin mester di 11 ora di soño, mientras mucha di edad di scol basico tin mester di 9½ pa 10 ½ ora di soño diario.

Falta di soño por stroba oloshi biologico di e mucha. Cu tempo e falta di soño por resulta den problema di comportacion.

Durante dia ta bon pa bo duna bo yiu oportunidad p’e scoge loke e tin gana di haci. Bo no mester wak vakantie manera algo cu atrobe abo mester regla p’e. Pero wak e como un oportunidad cu bo por yud’e siña maneha su vakantie.
Puntra bo yiu con e ta pensa pa pasa su oranan liber. Si television ta loke el a pone mas halto riba su lista, ta bon pa bo pone un limite diario n’e cantidad di ora cu e mag wak television. Pero no stop eynan.

Si bo encurasha bo yiu p’e haci su propio decisionnan tocante actividadnan cu e kier haci, e lo ta mas inclina pa realisa nan tambe.

Hunto boso por sinta pensa tur sorto di actividad. Despues lag’e pensa loke e kier pone den su plan di actividad y loke e mester haci pa realisa su plan. Si por ehempel, e kier mehora su manera di pitcha, yud’e palabra cu otro miembro cu lo kier yud’e cu esaki.

Otro sugerencia ta pa percura cu tin suficiente wega y buki manera di puzzel, of wega di mesa. Asina por yena un merdia cu por ta keto y alabez su sesonan ta ocupa.
Temporada di vakantie tambe ta un bon tempo pa duna bo yiu un tarea diario pa haci na cas. Ora un mucha por haci trabou di cas e ta sinti cu e ta forma parti di un team, e team di cas. E lo sinti su mes bon ora e ta util. Ora bo yiu completa un trabao, mustr’e bo aprecio. Y ocasionalmente dun’e un treat, un recompensa pa p.e. ora e caba di laba paña. Bis’e pa boso bai lama y despues boso ta pasa come un ice-cream Esaki ta siña bo yiu cu tin recompensa ora e usa su tempo liber na un manera bon. E les aki elo keda cu ne hasta ora vakantie pasa.

Articulo scirbi pa Fundacion Pa Nos Muchanan.

Fuente: articulo “Changes. School’s out!” – revista Working Mother.

Pa mas informacion of conseho por aserca Fundacion Pa Nos Muchanan, Cumana 2,

tel. 583-4247 / 588-0856, e-mail: info@fpnm.aw .