Webinar organisa dor di IDEA p’e grupo femenino cu colaboracion di Erasmus Consulting & Training tabata un exito.

Departamento di Asunto Economico, Comercio y Industria (DEACI) mediante su unit di Iniciativa pa Desaroyo di Empresa Arubano (IDEA) a organisa un webinar conhuntamente cu Erasmus Consulting & Training.

Dia 26 maart ultimo, e team aki a organisa e prome webinar cu a wordo organisa p’e grupo femenino. A scoge e prome webinar den maart, como cu esaki t’e luna cu ta celebra e Dia Internacional di Hende Muher riba e fecha 8 maart 2021.

Den aña 2021, IDEA lo bay organisa un serie di webinar pa Women Entrepreneurship (WE). Tur aña IDEA ta enfoca riba un grupo di entrepreneurs cu e kier dedica diferente topico comercial pa nan. Den pasado IDEA a enfoca riba e grupo di sector primario (Agripreneurship), riba e grupo di muchanan (Kidpreneurship), riba grupo di pensionado (Silver Entrepreneurship) y e aña aki a plania pa dedica riba e grupo femenino (Women Entrepreneurship).

E prome webinar di WE a hiba e titulo di “Strategic Entrepreneurship & Innovation”. Den e presentacion aki, sr. Edward Erasmus a elabora primeramente riba diferente razon cu e persona femenino por ta un mihor entrepreneur cu e persona masculino a base di investigacionnan haci. E razonnan ta, cu nan por colabora mas, nan ta mas resiliente, nan ta mas creativo, nan por calcula e riesgonan bon, nan tin vision riba termino largo y nan ta bon den controla nan ego. Tambe sr. Erasmus a presenta e diferente strategianan cu por wordo implementa den e setting di un SME, e yabi pa ta un exitoso entrepreneur, tambe a presenta e parti di creatividad y inovacion.

Den e ultimo parti aki sr. Erasmus a presenta e diferente tipo di nivel di inovacion cu ta existi, e “Disruptive Innovation” cu por ta beneficioso pa cierto consumidor, pero alabes e por ta desastroso pa industrianan existente. Tambe pa clausura e presentacion, el a presenta e proceso completo di inovacion.

E webinar aki a tuma lugar via e plataforma digital ZOOM y a haya un participacion di en total 21 persona femenino. IDEA ta sumamente contento cu e contenido y acogida di e webinar y tambe di e bon comentarionan ricibi di su participantenan na final di e webinar y via email. Un webinar sigur hopi informativo y cu pregunta di parti di e participantenan y un tremendo presentacion di parti di sr. Edward Erasmus cu propietario y trainer di e compania Erasmus Consulting & Training.

IDEA lo sigui cu su trayecto cu enfoke riba e grupo femenino pero tambe lo organisa webinar na 2021 cu lo ta dedica na un y tur cu kier cuminsa un negoshi of tin un negoshi existente y kier educa nan mes riba diferente topiconan comercial.   Un danki na tur e participantenan y un danki special na sr. Edward Erasmus cu a comparti su experticio cu tur esnan cu a join e webinar. Keda pendiente pa mas eventonan den aña 2021 cu lo wordo organisa dor di IDEA. Por sigui nos riba Facebook page @Idea-Aruba pa mas webinar y otro actividadnan di IDEA den futuro.