Caida di Gabinete Wever Croes ta forsa Minister demisionario Chris Romero subi lista bek

Mas y mas ta sali na cla den propio seno di partido y Gobierno di MEP, cu Prome Minister Evelyn Wever Croes a tuma un decision sin consulta cu mucho hende y sin premira consecuencianan cu esaki lo tin pa hopi hende di su propio partido.

Plannan pa regla cosnan prome cu Gabinete Wever Croes regla nan asuntonan, a cay na awa pa motibo cu e lider di MEP, baha Gobierno siman pasa, tabata e mihor momento pa mira si su partido lo por saca beneficio di esaki, mientras cu e unico resultado di e decision aki, ta cu MEP a caba cu partido POR definitivamente.

AWEMainta a publica na varios ocasion cu Minister Chris Romero lo a dicidi di bandona politica y tabata trahando riba su retiro caminda e lo a bay ocupa e puesto di Director di San Nicolas Ports Authority NV, cual entidad tabata den proceso pa wordo oficialisa pa Parlamento.

Sinembargo awor cu Evelyn a dicidi di desvolve Parlamento y manda su Gobierno cas e plan di Minister Romero a bay perdi y e unico opcion cu a keda awor, ta di bolbe subi lista di partido MEP pa mira kico lo pasa y con su futuro lo bira despues di luna di juni benidero.

Esaki ta conta pa mas candidato, kendenan inicialmente lo mester a bandona politica y haya un nombramento den un posicion sea den Gobierno of den un compania estatal, pero cu awor tambe a bay perdi.

Un di nan tambe cu AWEMainta a publica, ta Ady Thijssen kende tabata Presidente di Parlamento, pero kende tambe awor tin cu carga cu e consecuencia  di e decision drastico aki, caminda mesora despues cu Gobierno a cay, a declara den prensa cu e lo participa na su di cinco proceso electoral.

Si en realidad Romero dicidi cu e lo subi lista bek, esaki lo crea un problema pa lider di MEP, kende segun informacion for di e propio seno di partido, ta mustra cu e puesto number tres cu Romero tabatin ultimo eleccion, ta destina pa Dangui Oduber loke lo nifica cu si Romero kier bay riba lista, e tin cu keda contento c’un puesto mas abou riba e lista.

En realidad tin cu mustra cu e lucha den seno di partido MEP n’e momentonan aki, ta pa mira kendenan lo haya un lugar den e prome 10 candidatonan, mirando cu e situacion cu Gobierno di MEP a crea pa henter e pais cu mal maneho den ultimo tres aña y mey, lo bay pone cu e partido lo perde algun asiento y cu e lo bira un lucha, kende lo logra di bin na remarca pa drenta den Parlamento si e partido no ta den e proximo Gobierno.

Lider di MEP mes a crea un situacion hopi bruha pa su partido, ya cu a spera cu eleccion lo ta ten a luna di september y awor di repente den un periodo cortico di tres luna, e tres partidonan cu tabata forma parti di Gobierno, cu tabata completamente envolvi den gobernacion di e pais, awor ta bin haya nan mes ta adapta completamente pa awor numa inicia cu preparacionnan pa hinca un campaña den otro pa trata di convence un pueblo cu a sufri hopi pa cantidad di medida y caminda ainda tin mas medida na caminda cu Gobierno di MEP a aproba.