Durante control di Polis a bin topa cu persona cu tabata ser busca

Diahuebs algo despues di 10’or di mainta, Strand-Politie a bin topa cu un auto sospechoso para na Tres Trapi, mesora a bay controla e auto aki, un Chevrolet Celta cora, numera A69578. Pa casualidad e mesun auto aki tabata wordo busca for di den weekend largo caba. Esaki pa motibo cu el a agredi y menasa un security guard na Alhambra Casino.

Prome cu Polis a yega el a bandona e sitio den su Chevrolet Celta cora, pero testigonan a nota e number di auto y a avisa Polis. Mesora Polis a cuminsa cu un buskeda p’e auto aki, pero sin resultado. Riba e mesun dia aki, den oranan di anochi na altura di Citgo Oranjestad, presencia di Polis a wordo pidi pa un accidente.

Na yegada Polis nan a bin compronde cu ta trata atrobe di e mesun homber di e Celta, e lo a pasa auto riba pia di un homber y cu e mesun Celta cora a primi e homber contra un otro auto staciona. Na yegada di Polis atrobe e homber den e Celta a bandona e sitio. Polis un biaha mas a cuminsa un buskeda, pero atrobe sin resultado.

Te cu diahuebs mainta cu nan a bin topa cu e auto sospechoso aki na Tres Trapi y ora a controla e plaachi number a resulta cu ta trata di e Chevrolet Celta y homber cu tabata wordo busca for di weekend. E homber a keda deteni y tranporta pa Warda di Polis, caminda e lo mester bay duna cuenta di su actonan violento durante weekend pasa.