Gobierno di Reino a renobá tratado di FOL cu Merca

DEN HAAG – E  siman aki nomber di Còrsou, Aruba y Sint Maarten ta ser mencioná cu mas frecuencia cu normal, pasobra tin debate riba presupuesto di Reino den Parlamento Hulandes y Parlamentarionan ta haciendo pregunta pica special na momento cu e pais practicamente tin un Gobierno demisionario y den crisis y na bispo di formacion di un coalicion digno di un republica di banana.

Dos partido grandi kier keda respaldá Promé Minister Mark Ruttem pero 5 partido chikito no kier tende di Rutte, pero ningun di dos por forma un coalicion cu mayoria.

Esey ta laga espacio pa dedicá tempo na asuntonan di e parti di Reino den Caribe manera e contract cu Gobierno di Reino, nò di Còrsou of Aruba, pero Den Haag, tin cu Gobierno Mericano stacioná nan avionnan militar di patruyahe riba e dos islanan aki.

Gobierno di Hulanda mediante Canciller Stef Blok a anuncia den Parlamento Hulandes cu nan ta bay di acuerdo pa Merca sigi cu nan operacionnan antidroga for di nos islanan pa 5 aña mas.

E tratado actual di Forward Operating Locations (FOL) ta caducá dia 2 di november. Reino Hulandes y Merca a firma e tratado  dia  2 di maart 2000 na Aruba y el a drenta na vigor dia 2 november 2001.

E tratado ta ancrá den un Ley di Reino y ta di dos biaha cu ta prolongá e tratado.

Basicamente ta for di Aeropuerto Hato na Còrsou so nan ta operá pa nan buelonan di patruyahe, pero gradualmente nan a bin ta reduci e buelonan y e tipo di avionnan cu nan ta usa.

E buelonan ta productivo, pasobra nan a localisá embarcacionnan cu droga cu centenares di kilo di cocaina y marihuana.