Portanan cu ta habri na Hulanda pa Mike Eman y Richard Arends no ta habri pa lider di MEP

Durante esfuerso grandi di Gobierno di AVP den pasado pa haya un operador p’e refineria di San Nicolas, lider di MEP Evelyn Wever CRoes a yega di bisa cu ‘portanan cu ta habri pa Evelyn, no ta habri pa Mike Eman’ y awe e mesun palabranan aki ta contra p’e lider di MEP.

Den e prome siman cu campaña electoral a inicia ora despues cu e lider di MEP a entrega gobernacion bek na Gobernador, ta resalta bon cla, e intencion di partido MEP, esta di ataca e lider di partido AVP, Mike Eman frontalmente y na mes momento trata di atacha credibilidad di e politico Richard Arends, cu maniobranan antigua y ridiculo sperando cu pueblo lo cay p’e tipo di politica barata aki.

Ta un hecho cu Mike Eman ta gosa di reconocimento y respet di politiconan Hulandes caminda algun luna atras hasta a haci un solicitud riba e lider di AVP, p’e representa Reino Hulandes den un comision di Union Europeo, mientras cu Richard Arends ta gosa di hopi respet y confiansa na Den Haag.

Den e prome siman aki di campaña e intencion di partido MEP, cual ya caba AWEMainta a yega di señala for di algun luna atras riba e plan pa concentra atakenan baho contra e lider di AVP, ta birando un realidad.

Sinembargo e tipo di campaña aki ta destina pa fracasa ya cu partido MEP ta lubida cu el a goberna e pais pa tres aña y mey sin cumpli cu ningun promesa haci na pueblo, sutando pueblo cu cantidad di medida fuerte, rancando miyones for di pueblo y sector commercial, pero sin cu por mira algo positivo bek for di medidanan aki na interes di pueblo. Y awor e propio Evelyn Wever-Croes hasta a pidi pueblo despensa di no por a cumpli cu ningun promesa haci.

MEP no tin un solo proyecto of decision tuma pa mustra cu el a sirbi interes di pueblo di Aruba, no a inverti den ningun sector, caminda a saca miyones for di enseñansa, yamando maestronan pa sinberguensa y otro insultonan mas, mientras cu den e sector social, tanto cu a wordo  priminti, caminda e pone miyones un banda dado momento, sin cu por mira resultado positivo di esaki un caminda.

Al contrario debi na un maneho financiero sin pia ni cabes, pueblo a wordo confronta c’un inflacion cu a haci ainda mas dolor hunto cu e medidanan cu Gobierno di MEP a tuma y na lugar di busca un forma pa presenta un solucion pa drecha loke Gabinete Wever Croes a daña, ta bin hunga un politica sin sentido y sin solucion atrobe.

Den un intento pa mustra di a haci algo, Gabinete Wever Croes den presupuesto 2021 a pone cu un grupo di comunidad cu ta gana salario minimo, lo no tin cu paga loonbelasting, pero CFT a dicidi di pone Minister Xiomara Maduro anula esaki, loke manera tabata di spera, Prome Minister a bay di acuerdo tambe cu Hulanda pa haci.

Es mas, hasta awor cu Gabinete Wever Croes ta demisionario, e ta laga un herencia di medida atras pa proximo Gobierno atende cu nan, caminda caba pueblo ta sufriendo p’e decision di e Gobierno di MEP, pa reduci gasto medico cu 5 miyon pa luna y 60 miyon pa aña.

No ta cinco florin a kita for di pueblo, no ta 50 florin pero 5 miyon pa luna y ta mas cu claro cu n’e momentonan aki tin un caos grandi den cuido medico na Aruba pa un decision cu tanto Secretario di Estado Raymond Knops como Gobierno Hulandes a confirma, ta un decision di Gobierno di MEP.

Awor mey mey di tur e fracaso aki, ta dicidi di hiba un campaña cu na Ingles ta conoci como “character assassination’ contra e lider di AVP y un di e candidatonan di gran renombre manera Richard Arends.

Un politico hoben, kende a duna un aporta grandi na atende pa cumpli cu exigencianan di Hulanda y CFT pa yega na un presupuesto balansa, loke a wordo logra den presupuesto 2018 pero cu lamentablemente Gobierno di MEP a dicidi di cambia pa sirbi interesnan politico partidista y cu a pone cu despues Prome Minister Evelyn Wever Croes, mester a acepta tur, pero tur condicion cu Hulanda a pone den nan caminda,

Decisionnan cu pa falta di un maneho drechi, pa falta di un vision adecuado a pone cu e unico cu a sali perdi di e fracasonan aki, tabata pueblo di Aruba.