Prome Minister a baha su Gobierno pa integridad. Averigua si MEP a paga ticket y ‘daggeld vergoeding’ cu placa di fraktie

Tur fraccion den Parlamento, tin cu entrega un cuenta anual di e placa cu fraccionnan a ricibi como subsidio y lo ta bon pa fraccion di MEP tambe mustra e cuentanan anual aki pa mira si nan tambe a cumpli cu reglanan di integridad.

Partido MEP den e campaña electoral cu a inicia for di siman pasa ora cu Prome Minister a entrega retiro di Gabinete Wever Croes, e partido geel dia pa dia ta confrontando un enemigo hopi dificil p’e controla.

For di propio seno di e partido MEP, ta sigui sali informacionnan cu ta hopi dañino p’e partido, di hendenan cu ta sumamente disgusta cu e decision cu lider di e partido a tuma di baha Gobierno y otronan cu no a wordo corespondi riba nan promesanan di e Gobierno cu nan a sirbi.

Ta for di e grupo di hendenan disgusta aki a lek e informacion riba e caso di Alan Howell, kende no a wordo acusa ainda pa Ministerio Publico, pero a wordo condena pa Prome Minister y Minister di Husticia, cu consecuencia cu a dicidi di manda Gobierno cas, creando problema pa hopi hende di e propio partido.

Informacion extra oficial ricibi ta mustra cu si Prome Minister ta haya e caso di Alan Howell hopi serio, te pa manda su Gobierno cas, anto esaki e mester a haci for di hopi tempo caba ya cu nan tin indicacion cu for di e placa di fraktie di MEP, lo a paga pasashi pa un miembro di fraccion biaha pa reunion den exterior y tambe a cubri cu e placa aki, e asina yama “daggeld vergoeding” cu Parlamentarionan ta ricibi ora cu nan ta biaha pa reunionnan den exterior.

Un acusacion hopi serio, pero cu AWEMainta no a logra di confirma ainda, pero sin duda ta algo hopi serio, mientras cu tampoco por a haya informacion si fraccion di MEP a logra di entrega e ‘jaarrekening’ di su fraktie manera ta stipula tambe.

Den pasado fraccion di AVP a yega di mustra cu nan si a cumpli cu e exigencia aki di presenta nan cuenta anual pa cu e placa di fraktie, pero no ta conoci si e otro fraccionnan lo a logra di sigui e ehempel aki.

Si e informacion aki ta berdad anto tin cu sigui un investigacion tambe pa mira si enberdad a usa e fondo aki pa algo pa cual e no ta destina ya cu normalmente Parlamentarionan cu ta forma parti di comisionnan, ora cu tin reunion di Parlamento pa atende riba e topiconan cu nan comision ta atende, algun ta wordo asigna pa biaha y atende e reunionnan aki.

Pues si tin miembro cu no a bin na remarca pa haya e biahe aki paga, e no ta bay, pero awor ta mustra cu lo tin Parlamentario di fraccion di MEP, nan biahe lo a wordo financia cu e subisidio di fraktienan.

Por ultimo, tumando e denuncia haci recientemente cu Minister Glenbert Croes ta usa fondo di FASE, pa haci campaña cune. Ta bon p’esaki tambe ser investiga.