Santa Rosa ta haci apelacion na tur productor di webo pa registra

Santa Rosa, tin algun tempo caba ta haci apelacion na tur cunukero, criador y piscadornan, pa regista na Santa Rosa. Esaki ta conta tanto p’esnan cu ta produci den un forma comercial como tambe pa hobby. Actualmente, Santa Rosa ta ricibiendo varios melding di criadornan di galina pa webo, cu ta keha cu nan no ta logra bende e cahanan di webo cu nan ta produci y ta lamenta e tempo y placa cu nan a inverti den e produccion.

Actualmente na Santa Rosa, nos tin solamente 5 persona/compania, cu ta registra como criador di galina pa webo, mientras cu nos ta observa cu tin varios criador cu ta bende nan producto nan riba rednan social. Aruba ta importa un cantidad halto di webo pa aña y e iniciativa di produci nos propio webo fresco sigur ta uno di aplaudi y cual Gobierno ta stimula tambe.

Sinembargo, ta dificil pa tin datonan real di produccion y informacion di esnan cu ta practica e criansa di galina pa webo, si Santa Rosa no tin e informacion nececario. Sin datos, ta imposibel pa por analiza y controla e crecemento di e sector aki, p’asina por duna mas sosten y crea maneho nan cu lo aporta na un crecemento structura di e sector aki.

Recientemente, Santa Rosa a reuni cu e coleganan di Departamento di Asunto Economico (IDEA) y Departamento di Salubridad (DVG), pa delibera riba un posibel maneho integral riba produccion di webo local, den cual por controla e crecemento di produccion, haci control di calidad, sostene e productornan cu idea nan strategico mediante workshops y informacion, con pa mercadea nan producto y asina concientiza nos comunidad riba e beneficio nan di cumpra webo for di productornan local.

Den pasado, IDEA conhuntamente cu DVG y Santa Rosa, ya a duna varios charla na e productornan di webo y aki tambe, nan a wordo pidi pa registra na Santa Rosa y na KVK, p’asina nan por wordo considera como un contribuidor n’e produccion di webo local.

Mester remarca cu productornan di webo no ta paga belasting, dus no mester tin e miedo di registra como productor di webo comercial, pero si e ta importante pa Gobierno por tin un bista completo di cuanto webo nos isla ta produciendo y asina determina con lo por introduci maneho nan cu ta enfoca riba calidad, sustenibilidad y continuidad como productor.

Kico bo mester pa regista

Na momento cu bo bin pa registra na Santa Rosa, mester trece tur informacion di tereno (situatie plan), copia di “overeenkomst” p’e huurgrond of documento oficial den caso di tereno propiedad, buki di huurgrond di DIP como tambe bo ID y registro di KVK, si ta produci ariba un escala comercial.

Den caso cu ta famia of un tercera persona ta hasi uzo di e tereno den nomber di e doño, mester tin un “machtiging” mediante cual e doño di tereno ta duna permiso pa hasi uso di e tereno. Den caso cu ta un negoshi mester tin registro di KVK (Kamer van Koophandel). Na momento cu bo bin haci registracion lo bo mester yena un formulario cual tin diferente pregunta, dependiendo kico ta e sector cu bo ta activo aden. Tene bon na cuenta e ultimo puntonan aki pa no tin mal comprendemento na momento cubo tin registra. Percura tin bo tin tur cos na man.

Beneficionan na momento cu registra          

Na momento cubo registra casi sigur bo pregunta lo ta kico Santa Rosa lo por yudabo cune. Na memento cu nos tin tur informacion logicamente bo persona lo por yega na remarke pa sercibi servicionan di Santa Rosa. Esaki ta ensera den caso cubo ta un agricultor bo por haya e servicio di entrega di trucknan di awa.

Dado caso bo por yega na remarke tambe n’e “Awa pa Agricultor” cual Santa Rosa hunto cu WEB Aruba NV ta ofrece.

Negoshinan por haya “Invoerechten Vrij” Liber di Impuesto riba cierto producto pa nan propio uzo. No lubida e parti importante aki, cu ta pa propio uzo. Na momento cubo wordo descubri ta bende e producto aki na tercera lo bo por wordo cobra bek e suma di impuesto. E ta wordo mira cubo ta haciendo negoshi cu lo cu locual tabata e meta.

Si no ta logra pa bishita Santa Rosa personalmente, lo por registra online, dor di mail tur datos cu ta wordo menciona ariba, via info@santarosa.aw of por jama 5858102 pa ricibi mas informacion.