30 Aña kastigu di prizon pa kada asesino

WILLEMSTAD – Tantu Remyson Martina di 27 aña di edat komo Edmar Clemencia di 32 aña di edat a keda sentensiá ayera na 30 aña di kastigu di prizon pa asesinato di Ulrich “Uchi” de Pablo i Shurijon Noor, mas intento di asesinato kontra e agente polisial Schoop i un peaton ku yama Balentina Reinilia 7 di aprel 2019.

Tambe a forma parti di e akusashon, ladronisia ku violensia, poseshon di arma di kandela, anto pa Edmar Clemencia a bin aserka intento di maltrato pisá di e siudadano M. de Meza, destrukshon di outo i un biaha mas poseshon di arma di kandela.

E kastigu ku Hues a dikta ta netamente loke e duo di Fiskalnan señora mr. Clarelli Hato-Willems i C. Jansen a demandá komo kastigu na nòmber di Ministerio Públiko.

Remarkabel ta ku tantu Edmar Clemencia komo Remyson Martina ta miembro di e banda kriminal ARMY, anto ku e suseso mes ta dirèkt relashoná ku kaso di yalusí ya ku Edmar Clemencia a bin sa ku su señora, kende yama M. de Meza tabatin un relashon amoroso ku Ulrich de Pablo.

Edmar Clemencia tabata lider di e banda kriminal ARMY i komo tal el a probechá pa hasi uzo di su outoridat riba Remyson Martina, primintiendo esaki un suma di plaka pa likidá Ulrich de Pablo i fasilit’é ku arma di kandela pa e akto kastigabel aki por a tuma lugar.

Esei ta loke a tuma lugá n’e snack ku yama Chon Sin Snack den Bándariba, pa 13.12or di mèrdia riba e fecha menshoná.

Pa duna un deskripshon breve loke a sosodé, mester bisa ku den e kaso aki tabatin korementu ku arma di kandela tras di hende i lòsmentu di tirunan dirigí plenamente riba kaya.

Ta situashonnan horibel i peligroso pa hendenan ku no tin apsolutamente nada, nada di haber i ku inkonsientemente ta bin kai den e tipo werewerenan aki.

Pues un suseso sumamente for di òrdu, peligroso i menasante pa hendenan ku djis pasa den serkania pa nan mala suerte. E víktima Noor na sierto momento a kore buska manera di drenta un outo Mitsubishi, siendo su tras tabatin un di e pistoleronan (Martina) ku kara tapá i ku un arma di kandela den man.

Agente polisial Schoop a kue su arma di kandela reglamentario pa intervení, tirando riba Martina, kende a buska manera di drenta un vehíkulo Kia Forte ku e plachi di number D 69-39, manehá posiblemente pa Edmar Clemecia. Punto ta ku e Polis Schoop a alkansá Remyson Martina ku impakto di bala  anto for di e outo Kia a start tiramentu bèk riba polis Schoop.

Esaki no a keda leshoná, pasobra Schoop a logra skonde su kurpa. E víktima Noor sinembargo tabata bentá abou na suela ta bludu, na mas òf ménos 50 meter di distansia for di e outo di polis Schoop.

No muchu leu tabatin un otro persona bentá abou den un kurá di kas, kende tambe a haña bala i tabata mal heridá, anto ku aki tabata trata di Ulrich “Uchi” de Pablo.

Un situashon super dramátiko i peligroso tabata loke a sosodé den serkania di e snack ariba menshoná. Entre Edmar Clemencia i señora M. de Meza tabata reina bastante tenshon pa algun tempu kaba i de Meza tabata hui for di kas pa bai buska refugio na kas di su tio. E situashon na sierto momento a drecha, pero Edmar Clemencia a logra drenta telefon di M. de Meza pa bin konstatá ku e señora tabatin relashon ku mas hende.

Djei el a menasá di mata Ulrich “Uchi” de Pablo. Siendo sintá serka Polis pa hasi denunsia, M de Meza a bin sa ku entre tantu Edmar Clemencia enbèrdat a tira hende mata. Enfin, hasta siudadanonan ku no tabatin apsolutamente nada di haber a haña nan den e suseso peligroso i sumamente deskontrolá aki ku a tuma lugá plenamente riba kaya den serkania di e snack “Chon Sin Snack”.