Korte a dikta ku banko RBC no por será kuenta di Union Caribe

WILLEMSTAD – Dia 29 di yuli aña pasá RBC Royal Bank N.V. a kancela e kuenta di banko di e kompania di transakshon di plaka pa eksterior Union Caribe, pero e kompania a bai Korte pa demanda e banko i a gana su kaso.

Hues a dikta ku e banko no por será nan kuenta legalmente despues ku negosiashonnan pa yega na un areglo a frakasá.

Abogado dje bank a argumentá ku nan tin libertat pa disidi ku ken nan ke sigi hasi negoshi sigur mirando e reglanan internashonal severo riba tereno di kombati labamentu di plaka i finansiamentu di terorismo.

Ademas di e hecho ku si RBC mantené Union Caribe komo kliente, nan relashon ku e banko Merikano Wells Fargo ta kore peliger i den tal kaso nan relashon ku merkado Merikano lo kore peliger serio.

RBC Bank no ta dispuesto laga Union Caribe hasi nan transakshonnan di manda plaka Jamaica, Haïti, Republika Dominikana i Peru.

Ya kaba Banko Sentral a wanta e wisio sumario pa mira si e dos partidonan por a yega na un areglo ku lo pèrmiti pa RBC sigi tene Union Caribe komo kliente.

E intermediashon aki no a duna resultado igual ku tabata e kaso na Aruba kaminda Union Caribe Aruba tambe a demanda RBC Aruba i den Korte na Aruba tambe Hues a ordená RBC pa kontinua ku Union Caribe komo kliente.

E situashon na Aruba ta praktikamente mesun kos ku na Kòrsou, esta, Hues no a mira dikon e banko kier sera kuenta di Union Caribe praktikamente mesora i kousa ku 35 hende ta pèrdè trabou.

Naturalmente por sera un kuenta di banko di un kliente pero pa esei e banko mester tene kuenta ku interes dje kliente i wes no a mira motibunan prepoderante pa e banko a tuma un medida asina pisá.

Uniko manera ku Korte lo por a outorisá e kanselashon dje kuenta ta si a duna Union Caribe hopi tempu pa hasi otro areglo, pero den e kaso aki Hues a konsiderá ku den e kaso aki Union Caribe tin 17 aña kaba komo kliente di RBC i ku nan tin lisensia di Banko Sentral pa praktiká nan negoshi i no tin indikashon ku Banko Sentral tin reklamo kontra nan.

Reglanan ta na nan lugar pa evitá labamentu di plaka i no tin indikashon ku Union Caribe ta violá e reglanan aki. Es más, nan a paga pa un ofisina di akountent eksterno hasi un investigashon na kual nan a duna koperashon kompleto pa evitá mal uso dje sistema bankario lokal.