Ningun otro banko no ke Union Caribe komo kliente i 13 retiro lo kai

WILLEMSTAD – Un dje argumentonan ku e abogado di e kompania di transakshon di plaka Union Caribe a trese dilanti den e kaso ku nan a kuminsa kontra RBC Bank ta ku si RBC Bank sera nan kuenta, ningun otro banko lokal no ke nan komo kliente.

I sin kuenta di banko Union Caribe no por funshona i nan mester sera i manda 13 empleado kas.

E interes di RBC Bank pa sera kuenta Union Caribe kompará ku e daño ku nan ta kousa ne kompania di transakshon di plaka no ta hustifiká un medida drastiko di sera e kuenta.

I un argumento masha poderoso di e abogado di Union Caribe tabata ku no tin indikashon ku e banko Merikano Wells Fargo ke stòp nan koperashon ku RBC Bank.

Ningun momento Union Caribe a faya di kumpli ku su kompromisonan ku e banko kual na su turno no a ofresé alternativa pa fasilitá Union Caribe sigi ku su negoshi.

Manera e situashon ta pinta, no ta hustu pa RBC sera e kuenta di Union Caribe.

Pero kaminda RBC tin rason ta kaminda nan ta bisa ku mundu a kambia pa loke ta sirkulashon di plaka kèsh i no ta manera 20 aña pasá mas i ku e reglanan kontra labamentu di plaka ta diferente for di antes.

Pero esei ta konta p’e obligashon di bankonan komo instrumento sentral den trafiko komersial i e libertat ku nan mester tin pa sera kuenta di un kliente.

Hurisprudensia den kasonan similar kontra RBC Bank ta mustra ku bou dje mesun kondishonnan e banko a pèrdè kaso kontra dos casino na Kòrsou i Sint Maarten ora nan kier a sera nan kuenta.

RBC kier a sera nan kuenta, pasobra nan no kier a sigi karga ku e risiko ku klientenan manera Union Caribe lo pone nan relashon ku Wells Fargo na Merka.

NO TA TUR KASO TA IGUAL

Hues a splika tambe ku no por kompará e kaso di RBC Bank ku esun di MCB ku den pasado a sera kuenta di ofisina di number Administratiekantoor Dollar i Jamaroma Lotteries c.s. vs WIB.Den e kasonan ei e kondena penal di doño dje kadena di ofisina di number a hunga un papel importante.