Tur esnan cu tin un permiso pa tira pisca sa e reglanan y e consecuencia di kibra esakinan

Reglamentacion pa piscamento cu harpun ta un topico cu ta den controversia pa hopi tempo, pero sin cu realmente por a yega na un solucion beneficioso pa tanto flora y fauna, como tambe e piscadornan.

For di inicio di Gabinete Wever-Croes, e Titular di Transporte, Comunicacion y Sector Primario, sr. Chris Romero, a sa di hiba un lucha pa reglamenta piscamento cu harpun teniendo na cuenta e necesidad di nos piscadornan pa pone pan riba nan mesa.

Sintando na mesa cu e diferente stakeholders p’asina por a yega na un consensus unda cu lo mester beneficia nos piscadornan, na mes momento cu ta proteha nos medio ambiente, actualmente por mira un maneho mas concreto pa loke ta “spearfshing” na Aruba.

Contrario na diferente declaracion infunda cu a keda publica ultimamente, e realidad ta cu cambionan di e Landsbesluit pa regulacion y proteccion di bida marino ta na Directie Wetgeving actualmente.

E maneho lo ta mescos cu esun implementa na Hulanda (Bonaire), p’asina proteha nos mundo marino, pero tambe na mes momento teniendo na cuenta e necesidad di nos piscadornan pa eherce nan trabou, pero semper di manera sostenibel.

Logicamente tin sancionnan na lugar p’esnan cu kibra reglanan actual y ley. Esnan den posecion di un permiso pa tira pisca ta na altura di e reglanan y tambe sa cu nan permiso lo keda cancela inmediatamente na momento cu wordo gara den practica ilegal di piscamento. Pa loke t’e parti di control, Warda Costa ta haciendo esaki debidamente y ta na altura di e reglamentacion actual.