Wardacosta mester a los tiro riba motor di un boto pa par’e

Diahuebs anochi, 8 di april 2021 pa mas ó menos 22:30 or Centro di Rescate di Wardacosta a wak riba radar un contacto saliendo for di area di Arashi.

Mesora e Metal Shark-11 a sali pa identificá e contacto. Pa mas ó menos 23:00 e Metal Shark a para e boto na 5.5 miya fo’i Manchebo Beach despues di un persecucion unda mester a los un tiru di advertencia pa para e boto.

Sinembargo esaki no kier a stop. E ora ey mester a tira dirigí riba e motornan di e boto pa stop esaki.

A encontrá 2 hende homber Venezolano abordo. Mientrastantu a pidi Cuerpo Policial di Aruba pa bay wak den area di Arashi como cu tabata sospechá cu ilegalnan por a subi tera ó cu por a laga droga atras. Polis no a haña ningun sospechoso den e area. Wardacosta a slép e boto cu no tabatin niun nomber ni number di registracíon, bay cu né n’e punto di sostén di Wardacosta pa más investigacion.

Pa 03:00 di mainta a entregá e dos hombernan na Warda Nos Costa.

Si nos mester señala cu ningun radar na Aruba no a detecta e boto aki. Tambe autoridadnan hudicial a haya falta di e helicopter di Polis cu no a ni lanta buelo pa yuda.