Airport Tax di US$210 lo a mata turismo aereo

WILLEMSTAD – E resiente informe ku nos a publiká kaminda Corte a rechasá pa duna Curacao Airport Partners pèrmit pa subi loke popularmente nan ta yama Airport Tax, lo a mata turismo ku avion pa nos isla morto-. Esei no tabata solamente konklushon di Hues den e kaso, pero varios kompania di aviashon a reklamá serka gobiernu tambe.

Partikularmente e kompania di aviashon TUI tabata masha enérgiko den su protesta ora nan a manda bisa tantu CAP komo Gobiernu ku ‘….by raising this from 45 to USD 210 you are literally killing tourism to Curaçao’.

P’esei Hues a komentá ku e oumento fuerte di tarifa ku CAP a pidi Minister no tabata hustu i nesesario.

Ku argumentonan sano Gobiernu a refuta un oumento fuerte di oumento di tarifa i no ta manera CAP a splika – refiriendo na rapòrt di un eksperto (??) – ku e oumento lo no tin efekto negativo pa Kòrsou.

(Nota di redakshon: E eksperto aki probablemente nunka lo a gradua, pasobra un oumento quadrupel asina lo a mata turismo of loke a sobra di dje, morto-morto na Kòrsou).

Ta p’esei e kompania di aviashon Hulandes TUI a afirmá enfatikamente ku e oumento lo ta fatal.

Ta un hende sin sentido so por pretendé ku un oumento asina lo no perhudika Kòrsou su turismo pa Kòrsou i partikularmente e kompanianan di aviashon ku ta bula entre Hulanda i Kòrsou.

Por lo tantu no tin base pa pretendé ku un oumento fuerte lo NO perhudiká e kapasidat di kompeti ku otro destinonan.

I pa splika bon kla, gobiernu a argumentá ku e hecho ku ni maske hendenan lo bula si oumenta e tarifa 4x, esei no ta nifika ku nan a bai di akuerdo, pero ta nesesidat ta pone nan bula.

Loke CAP a pidi ta pa e aña aki te aña 2021 te ku 2024 introdusi e siguiente tarifanan:

Bonaire USD 34.50; St Maarten/Aruba USD 57.00; International USD 89.50; Transfer USD 14.00.

Seguidamente CAP su abogado a pidi i ku Hues a ninga ta pa Gobiernu paga CAP shenmil florin pa dia ku por yega te 5 mion florin maksimo si no introdusi i duna pèrmit pe tarifanan aki.

E DEMANDA TIN BASE PERO NO TA REALISTA

Hues a evaluá e demanda i a konstata ku tin base pa trata e kaso lo mas pronto posibel, pasobra CAP ta hañando muchu menos entrada komo konsekuensia dje pandemia di Covid.

En todo kaso muchu menos entrada ku nan a kalkulá i ku ta nesesario pa kubri nan gastunan regular.

Segun CAP e oumento aki t’asina nesesario ku si no subi e tarifa, e menasa di bankarota ta vislumbrando, pasobra nan no por kumpli ku nan obligashonnan finansiero.

Di otro banda e abogado di CAP a sugeri pa Hues asumi un actitut masha kouteloso i no dikta algu ku ta kompetensia di Gobiernu. Ta solamente si Gobiernu aktua irasonabel por bai dilanti Hues.

Sinembargo no mester yega asina leu pasobra tantu Gobiernu komo CAP ta di akuerdo ku aña 2020 tabata brutal pa e kompania pa motibunan ekstraordinario imprevisto. I ku bou dje sirkunstansianan ei no por a mantene e tarifanan ku tabatin.

Pero tampoko ku mester subi e tarifa pa kubri e invershonnan ku CAP a hasi na aeropuerto.