Defensa ta ampliá sosten na Polis

WILLEMSTAD – Riba petishon di KPC (Kuerpo Polisial Kòrsou) Defensa ta duna, kuminsando di diabierna, èkstra sosten den mantenshon di medidadnan en konekshon ku Covid. Den esaki entre otro e tin di haber ku e medidanan di plachi di dia (numbernan di outo) i e toke de keda.

Durante lunanan ku a pasa, ya Defensa tabata duna sosten Militar kaba, pero esaki ta keda ampliá awor, komo konsekuensia di e situashon serio di Covid na Kòrsou.

Outoridatnan di Kòrsou a pidi Defensa pa èkstra sosten. Te ku diabierna e sosten tabata ser duná pa Milisianonan di Milisia Kòrsou.

For di diabierna tin mas Milisiano riba kaya pa duna sosten den e mantenshon di tur e medidanan di Covid. I ademas Defensa awor ta inkorporá Militarnan di ‘Compagnie in de West’. Nan ta prosedente di e Brigada Aéreo Real.

Sosten na KPC ta un forma di sosten Militar. Sosten na outoridatnan sivil ta un di e tareanan konsitushonal di Ministerio di Defensa.