Gobierno ta crea impresion di kier terorisa pueblo cu Covid-19 pa influencia campaña

Campaña electoral 2021 lo ta totalmente diferente cu campañanan anterior caminda henter e proceso ta wordo influencia p’e pandemia cu ta asotando e isla caminda e forma di bishita na cas, ta bay ta hopi diferente cu otro eleccionnan.

Sinembargo ya caba por tuma nota cu actual Gobierno demisionario, mustrando aki enfaticamente riba partido MEP, ta creando e impresion cu nan lo haci e maximo esfuerso pa influencia y limita e forma di hiba campaña di partidona rival.

Ya caba e plan di elimina un di e rivalnan politico cu ta partido POR, a tuma lugar caba caminda e daño haci na crebilidad di lider di e partido Alan Howell, sin cu tin un acusacion contra di su persona, ta muestra di esaki.

Desde cu partido AVP riba dia di celebracion di Himno y Bandera a impresiona cu su actividad di drive by y drive thru, Gobierno scondi tras di lomba di crisis team, a dicidi cu lo no permiti ningun actividad di drive by y drive thru, mientras cu a bay over na prohibi bishita na casnan di famia rond e isla.

Ta duna e impresion cu e medida aki ta pa evita cu lo tin mas contagio di bishitantenan cu ta hiba e virus p’esnan den e cas cu nan ta bishita, pero realidad di e caso ta cu e medida aki ta uno politico pa evita bishita na cas di votadornan pa partidonan rival.

Pa colmo algun politico di partido MEP mes a pone riba nan facebook page, momento cu nan si ta bishita cas di votadornan, violando e propio medida cu nan Gobierno a impone, mientras cu diabierna ultimo, a dicidi di prolonga e medidanan aki pa limita ainda mas e accionnan di rivalnan politico.

Na Hulanda den e fin di siman cu ta tras di lomba, por mira cu Gobierno tin intencion di “versoepel” e medidanan, caminda lo bay permiti e sector di horeca habri bek den un forma responsabel, permiti salonnan di beyesa bolbe cuminsa ricibi clientenan y den stadionnan di futbol, ya caba a cuminsa permiti fanaticonan caminda ta spera cu pa fin di luna aki, lo permiti maximo do 8 pa 10 fanatico den tribuna, depende di e capacidad di e stadion.

Mirando e mentalidad di Gobierno di MEP, cu ta bon na altura cu nan no ta den e mihor posicion politico actualmente, caminda a kita placa di trahadornan publico tratando di gaña cu ta Hulanda a exigi esaki, pero awor a resulta cu ta Prome Minister Evelyn Wever Croes a bin cu e plan aki.

Practicamente tur dia e mal contento y por hasta bisa rabia formal ta sigui crece contra Gobierno p’e decision di baha gasto di AZV cu 5 miyon pa luna y awor cantidad di hende den necesidad, no por haya nan medicamentonan cu nan tin añanan largo ta depende di nan.

Esaki ta otro logro di Gabinete Wever Croes, cu a trata di pusha e culpa di e medida aki riba Hulanda, pero mesora Secretario di Estado, Raymond Knops a mustra tur hende cu esaki ta otro briyante idea di Prome Minister Evelyn Wever Croes.

Por spera cu den simannan dilanti, cu Gobierno lo busca un formula pa terorisa pueblo cu informacionann espantoso relaciona cu e pandemia, lo trata di hinca miedo den comunidad pa no ricibi politiconan rival na nan cas y asina MEP lo trata di minimalisa e daño politico grandi cu e mes e impone riba su mes cu e desasternan di medida cu nan a pone riba pueblo.