Introduccion di Rycond Santos do Nascimento como candidato riba lista berde

AWEMainta recientemente den su seccion di politica, a mustra cu proximo eleccion 2021 cu lo tuma lugar dia 25 di juni, no ta momento pa partidonan of politiconan cu kier “purba” algo, ya cu e situacion cu Gobierno di MEP ta lagando e pais aki aden, simplemente ta rekeri tur seriedad di mundo.

Partido AVP cu for di algun aña caba a bin ta trahando riba un vision nobo, buscando solucionnan adecuado y efectivo pa un mihor desaroyo di pueblo y henter a pais, diadomingo atardi a presenta un di su candidatonan nobo p’e proximo proceso electoral.

Un persona cu a forma parti di un grupo di profesionalnan, kendenan a bin ta trahando riba un plan di gobernacion pa atende cu necesidadnan di e pais den tempo dificil aki, hunto cu otro profesionalnan bon prepara, kendenan tambe lo bay forma parti di e lista berde pa proximo eleccion.

Ayera durante di su presentacion na Cas di Partido dilanti un publico limita cu ta cuadra cu reglanan stipula pa DVG, haciendo uso di e sistema virtual, e presentacion a capta hopi atencion p’e forma con esaki a ser hinca den otro, mustrando profesionalismo y mesun determinacion cu e candidato Rycond Santo do Nascimento ta para p’e.

E ceremocia a inicia cu presentacion di mama di e candidato Rebecca Geerman, kende a duna un relato di formacion y crecemento di Rycond, tanto  riba tereno di educacion y formacion, pero mas tanto su caracter determina pa logra algo positivo den su bida caminda su yiu semper a busca y haci lo maximo pa tur rond di dje tambe desaroya nan mes y sinti nan mes un mihor hende tanto pa nan mes como pa otronan.

Sra. Rebecca a confirma cu su yiu lo conta cu su respaldo total den su carera como politico y a resalta algo di e himno di Aruba mustrando riba e expresion cu “Dios por guia y conserva su amor pa libertad,” mustrando riba e importancia pa pueblo di Aruba haya su libertad bek.

Cu nada por kibra e libertad cu e ser humano tin den su bida y a pidi pa respalda su yiu p’e cumpli cu e proposito cu el a pone su dilanti pa drenta arena politico.

E conocido maestro, mr. Luciano Milliard tambe a haci un introduccion di Rycond, kende el a conoce den su periodo na Universidad di Aruba, mustrando tur loke el a mira di un persona determina pa haci di su mes y di otronan, un mihor persona, bon prepara pa sirbi interes di otronan.

Rycond na momento di a hiba palabra a mustra cu den e mundo di awendia, “para na banda ta inaceptabel” ya cu tin hopi asunto di vital importancia p’e pais, cu tin cu wordo atendi y busca un forma pa sali for di e situacionnan aki.

E flamante candidato di AVP tambe a mustra cu tin cu opone n’e cultura di represaya, mester contradeci liderasgo anti democratico, manera por a mira ultimo tempo den enseñansa y tin cu crea un liderasgo participactivo, mustrando cu awor no ta momento pa para na banda. Lider di partido Mike Eman tambe a hiba palabra mustrando cu e momento di presentacion di Rycond como candidato pa partido AVP, ta un momento grandi historico y a pidi pa Dios guia su persona y conserva su amor pa libertad, yamando bon bini na un di e candidatonan fuerte sin duda cu AVP lo presenta cu mester bay saca e pais for di e situacion actual cu tin, pa gran parti crea pa un Gobierno sin vision y sin capacidad.