Joe Najjar ta marca su di 15 aniversario na cabes di La Cabana Beach Resort & Casino

Dia 6 di april, 2021, a marca e di 15 aniversario di Joe Najjar, General Manager, na La Cabana Beach Resort & Casino. E celebracion n’e resort a inclui un areglo grandi di blaas cu a sigui Joe manera un sombra tur caminda cu el a bay riba su dia special. Joe tambe tabata e invitado di honor n’e lunch di Chit Chat Cafe, y parti merdia el a wordo celebra n’e special Associates’ Meeting, compartiendo un brindis y ricibiendo felicitacionnan caluroso.

Joe a wordo contrata como e General Manager nobo di e resort algun luna despues di e separacion di La Cabana for di Villas wing, na final di 2005. Como e GM nobo, el a encontra varios reto, algun legal, liga n’e separacion, y otronan tabata practico: E propiedad di 15 aña tabatin mester di renobacion, e cuenta di reserva tabata bashi, e operacion di F&B a genera perdidanan anto e resort tabata over-staffed, den bista di bira mas chikito.

Cu su experiencia extensivo den F&B y expertisio den maneho di resort, Joe a hala un rosea grandi anto duik su mes den e setup unico di Timeshare di La Cabana. Restructurando F&B, creando ingresonan periferico di tiendanan y huur di kamber p’asina por mantene costonan operacional mas atractivo pa doñonan di timeshare. Joe a traha diligentemente cu e hunta directiva pa planifica renobacionnan na 2008, enfrentando un situacion economico fastioso por medio di un crisis financiero global.

Cosnan no a sosode di un dia pa otro, pero Joe nunca a perde su concentracion pa purba eleva La Cabana Beach Resort & Casino na su siguiente nivel di servicio, engrandece su producto di vacacion, inverti den spaar energia, control di costo, reserva provisionnan, desaroyo di empleadonan, y mehora eficiencia y productividad.

Durante e ultimo añanan, Joe a asegura cu La Cabana a mantene suficiente recursonan pa train y desaroya tur empleado di La Cabana. E resort a adkiri un tremendo reputacion pa celebra logronan y organisando actividadnan creativo, incluyendo empleadonan y nan famianan extendi.
Joe su pensamento cu cuidando La Cabana su empleadonan lo resulta den nan tambe cuidando doñonan di timeshare y bishitantenan, sigur a duna su fruto. Doñonan di timeshare inmediatamente a reconoce e balor y beneficio den nan inversion di vacacion aumenta, y nan a regresa frecuentemente, haciendo bishitantenan bira doñonan. Hunto cu e team, La Cabana su Mision y Vision a wordo poni den accion anto esaki a evoluciona durante añanan, birando balornan sagrado, yenando e operacion cu proposito. Cu wowo pa detaye y su canamento frecuente den e resort su propiedad, Joe a sigura cu e resort ta cumpli cu su promesa, y continuamente a crea vacacionnan memorabel.


Joe su liderazgo a inspira hopi, anto esaki a hasta derama su mes na otro areanan, incluyendo rolnan di liderazgo na Aruba Hotel & Tourism Association, y Aruba Timeshare Association, como tambe e comunidad den general. Ta obviou cu Joe ta consciente di derechonan y bienestar di nos animalnan, arte y cultura, muchanan, educacion y medio ambiente. Ariba di tur cos, Joe ta stima Aruba y ta disfruta cana den naturalesa, biking, landamento, y baila den Aruba su paradanan grandi di Carnaval tur aña, lagando un poco stress di trabao bay un rato.

Nan ta bisa cu tempo ta bula ora cu bo ta pasando bon. La Cabana ta e pasion di Joe pa e ultimo 15 aña anto ta siguramente increibel con lihe e 15 añanan aki a pasa. E aña cu mas desafio? Sin duda algun, 2020. Joe hunto cu su team mester a confronta cu e shutdown di e isla por medio di e pandemia di Covid19. E resort a cera su portanan, pero trabao a continua, for di cas, y cu un crew minimo na sitio. Planificacion strategico a wordo haci y bao di liderazgo di Joe e resort a nabega e tormenta di perdida di entrada y haya forsa bek, manteniendo tur empleado full-time trahando pa un miho futuro, pa e resort, e isla y mundo henter.

Joe, pabien cu bo 15 aña y danki pa tur loke bo a haci pa La Cabana. Ban celebra! Cu Dios drama su bendicion riba bo cu bon salud y energia pa sigui cu bo bon trabao pa hopi mas aña venidero.