Mas enfermera y dokter Hulandes ta yega Kòrsou

WILLEMSTAD – Diabierne mainta a sali for di Hulanda ku e buelo di KLM pa Kòrsou, un tim di enfermeranan spesialisá, laborante i ayudante mediko dje organisashon: “Extra handen voor de zorg” pa bin duna asistensia  mediko na institutonan mediko na Kòrsou i kaminda ta nesesario riba e otro islanan.

E situashon hospitalario ta masha serio na Kòrsou pa motibu dje kantidat haltu di hendenan infektá i e kantidat di kama limitá den kuido intensivo.

Ta trata di un grupo di personal mediko ku ta riba stand-by pa presentá kaminda ta nesesario mas rápido posibel pa aliviá e situashon agudo pa yuda hende malu.

Nan ta biaha ku ekspertonan ku ta regla nan akomodashon i transporte lokal.

Ministerio di Salubridat na Hulanda a enkargá e organisashon “Extra handen voor de zorg” diabierne pa manda mas personal Kòrsou i pe otro islanan.

Kordinadó dje grupo ta Saskia Wooning, kende a splika ku ora nan a tende dje notisianan for di Kòrsou nan tabata konvensi ku nan por yuda.

Sin basilá mesora  nan a hasi un apelashon riba e kolaboradornan ku ta stand-by riba nan lista i for di djadumingu nan tin un lista di 350 persona ku a mèldu pa bin Korsou.

Dje manera aki e organisashon por demostrá tambe ki balor adishonal e organisashon tin riba tereno di kuido den henter Reino i ku nan por yuda kaminda nan por.

Nan a regla bakunashon dje boluntarionan promé ku nan biaha, e pèrmitnan di trabou nesesario, akomodashon i tur fasilidat ku  ta nesesario pa por drenta den akshon lo mihó posibel riba nos islanan.

Nan tei spesialmente na momento ku e nesesidat ta agudo i mester di man èkstra.