Partido PPA y Marisol Lopez Tromp lo por ta base di e partido oranje nobo

Historia tin ora ta ripiti su mes y diasabra mainta ora c’un grupo di hende a presenta dilanti cas di ex Minister Marisol Lopez Tromp na Malmok pa entrega varios carta cu suplica pa su persona subi lista y participa den eleccion, no por a mira esaki los for di otro ‘stunt’ politico cu a tuma lugar na 2017, pa colmo cu mesun politico aki.

Na 2017 a wordo publica potret den medionan di comunicacion digital di un encuentro priva y secreto cu lo a tuma lugar na Corsou, caminda tres politico lo a reuni cu otro den forma clandestine, pero cu despues a resulta di no t’e caso.

Un stunt sin duda caminda e ora pueblo a sera conoci cu e berdad politico di partido POR, esta caminda e fundador y lider e tempo ey, Otmar Oduber, lo a biaha pa Corsou pa reuni den tur secrecia cu lider di Democracia Real, Andin Bikker y cu ex politico di partido MEP y AVP, Marisol Lopez Tromp.

Despues di e stunt aki, ya cu despues a resulta cu esaki tabata un asina yama ‘gimmick’ politico p’asina duna mas atencion n’e union cu a ser forma despues,  nan a regresa Aruba y bin anuncia cu nan lo ta hunto riba e lista di POR, e Forza Politico Nobo di Aruba.

Awe ningun di tres politiconan aki ta uni mas na partido POR y ainda no ta conoci si tanto Bikker of Lopez Tromp lo subi lista di un partido p’e eleccion di aki tres luna.

Den publicacion di loke a sosode diasabra, Marisol Lopez Tromp a mustra sorprendi di a mira un grupo di hende cu a bin dilanti di su cas, kendenan lo ta su votadornan di ultimo eleccion, haciendo un suplica p’e subi lista y bin traha pa pueblo y pa nan.

Mientrastanto AWEMainta tambe tin informacionnan cu lo tin otro desaroyonan tumando lugar caminda segun datonan ricibi, dentro di algun dia lo anuncia cu partido PPA lo participa na proximo eleccion, apesar cu e partido a perde su lider algun luna atras ora cu Benny Nisbet a fayece, pero awor parce cu e partido lo reanuda su actividadnan politico y lo tin desaroyonan caba tumando lugar.

Hasta nos a ser informa cu lo trata di produci un lista di candidato consistiendo di solamente hende muher y den e cuadro aki ta mira e stunt di diasabra ultimo dilanti cas di Marisol Lopez Tromp, como un indicacion cu probablemente e tambe lo por forma parti di e movecion femenino aki.

No por a confirma si e partido lo consisti solamente di hende muher, pero pa gran mayoria esaki lo t’ e caso cu kisas algun persona masculino tambe riba e lista.

Mientrastanto tambe ta conoci cu fundador di partido MPA, esta abogado Monica Kock, lo a anuncia cu su partido lo ta na disposicion di Marisol Lopez Tromp si e kier bay eleccion, pero aki tampoco tin algo concreto riba esaki, pero den proximo dianan lo haya mas informacion concreto mirando cu tin poco tempo prome cu eleccion tuma lugar.

Acerca tambe tin otro nombernan ta cayendo den e circulo politico  y entre nan tin Lisette Malmberg, kende lo ta preparando pa drenta arena politico, un rumor cu a yega di circula caba den pasado, pero lo tin cierto indicicacion cu esaki lo por t’e caso pa eleccion di dia 25 di juni benidero y tambe cu e lo por forma parti di partido PPA (nobo).