Polis a dal gòlpi duro kontra importashon di arma y droga

WILEMSTAD – Relashoná ku un kaso ku e Divishon di Krímen Organisá di Polis ta investigando, a tene entrada hudisial na tres (3) diferente adrès. Ta trata aki di un kas na West Groot St. Joris, Kwartje i un apartamento den Mahuma.

N’e entradanan hudisial aki a partisipá aparte di e divishon ariba menshoná, KMar, Defensa i Tim di Aresto di Kuerpo Polisial Kòrsou. N’e adrès na Kwartje, a haña i konfiská 24 arma di kandela, bou di kua revòlver, pistol i skopèt di hagel.

Tambe e unidatnan a bin topa 9 bulto di mariwana i kokaina. A detené n’e mesun adrès ei tres hòmber Venezolano: O.J.R.C. , J.G.A.T. i G.J.R.C. di respektivamente 27, 23 i 21 aña di edat.

Tambe dos hòmber nase na Kòrsou, J.L.F.Ph. i R.B.A.E. di respektivamente 30 i 23 aña di edat.

A konfiská e armanan i e droga, miéntras ku a presentá e kinteto dilanti di un Fiscal ouksiliar ku a ordená nan enkarselamentu pendiente di mas investigashon.