Ta kita remedi di pueblo, pero tin placa pa tapa mal maneho cu Andrew Hoo

Mey-mey di angustia  y sufrimento di pueblo, mey-mey di lamento di trahadornan publico y di trahadornan di companianan estatal, Minister di Husticia demisionario ta tuma un decision cu ta un refleho concreto di e mal maneho cu su Gobierno a bin ta hibando pa tres aña y mey caba.

Siman pasa c’un sonrisa grandi, cu ta duna e impresion cu Minister Andin Bikker ta feliz cu su decision, ya cu realmente por fin el a logra di haya un solucion pa su propio fracaso, el a anuncia nombramento di Andrew Hoo como hefe di IASA.

Un logro  sinembargo cu no ta ningun logro ya cu realmente Bikker no a haci pueblo un fabor, al contrario el a bolbe confirma e incapacidad di e Gobierno cu e tabata forma parti di dje, e refleho evidente di e falta di vision di tanto su persona como Minister di Husticia como di su Gobierno fracasa.

Ta bon pa mustra cu esaki no tin nada di haber cu e persona di Andrew Hoo of su capacidad como profesional, sinembargo su persona ta refleho di incapacidad conoci di Andin Bikker como Minister di Husticia, un soña personal di e mandatario, pero caminda el a converti e soño aki di ta Minister un dia, den un pesadiya pa henter pueblo.

Na luna di april di 2018 cu gran fanfaria e mesun Bikker aki a bay prensa y anuncia cu el a logra algo grandi pa Cuerpo di Polis, ora cu el a logra convence y recluta sr Andrew Hoo pa bandona su posicion den sector priva, e sector turistico caminda e tabata trahando na un hotel grandi, p’e bin fungi como Alto Comisario interino di Cuerpo di Polis.

Bikker a mustra su satisfaccion p’e hazaña aki, cu aprobacion di Conseho di Minister pa trece sr. Hoo aden, pero ni dos aña despues na luna di maart 2020, e mesun Bikker aki ta dicidi di core cu sr. Hoo, sin nunca anuncia e motibo, pero cu solamente cu Hoo lo ta na disposicion di su persona y di Conseho di Minister.

Na luna di september di mesun aña 2020 aki, Minister Bikker ta anuncia cu Conseho di Minister a bay di acuerdo cu su proposicion, pa nombra Andrew Hoo como representasnte special di Ministerio di Husticia den cuadro di acuerdonan di cooperacion cu Merca y otro paisnan den Reino pa loke ta asunto di husticia.

Ni un luna despues, na final di luna di october 2020, ata Minister Bikker ta anuncia cu Andrew Hoo lo encabesa un management team cu el a forma pa atende y soluciona problemanan den Cuerpo di Bombero, problemanan cu ainda no a wordo soluciona y atendi.

Awor siman pasa di aña 2021, pues cinco luna despues, e mesun Minister Bikker aki ta bin dilanti y anuncia cu Conseho di Minister a bay di acuerdo pa nombra Andrew Hoo como Director di IASA.

Algo ta robes cu e asunto aki, ya cu Bikker a retira Hoo entre otro pa motibo cu e no tabata capacita pa actua como Alto Comisario di Polis despues cu el a elogia e persona aki, pero awor e ta mira cualidadnan grandi p’e mesun hende aki dirigi IASA.

Aki un biaha mas ta confirma e falta di sinceridad cu Gabinete Wever Croes tabatin cu pueblo durante su periodo di gobernacion cu Bikker incluri, ya cu fuera cu pueblo ta sufriendo y por muri pa falta di remedi cu a wordo kita for di dje, trahadornan publico mester a entrega parti di nan salario riba recomendacion di Minister Presidente mescos cu trahadornan di companianan estatal, si Gobierno tin placa pa hunga e tipo di weganan aki cu placa di pueblo.

P’e cosnan di locura aki, pa financia fracaso total di un Minister, tin placa pa tira afo na granel ya cu simplemente c’un Landsverordening den man, sr. Hoo no por wordo kita sin cu e lo costa pueblo hopi placa.

No e asunto aki, lo ta bon pa Minister demisionario Andin Bikker, entrega su retiro, hasta como Minister demisionario ya cu e no merece di sigui den e puesto aki, ni den su calidad awor.