Apesar di pandemia, apesar di crisis financiero, e ser humano central ta keda poni central

Cu ImSan ta bira un hospital ta un noticia cu nos tur tabata sperando. Ayrea 12 di april 2021 pa 3’or di atardi oficialmente ImSan a bira un hospital cu 22 kamber pa estadia di corto duracion. Un meta cu ta forma parti di MEP su programa di Gobernacion 2017-2021 ‘Nos Vision t’e Solucion’, asina Shailiny Tromp-Lee di MEP a duna di conoce.  

Semper MEP a kere den ImSan y a haci e inversionnan necesario p’e logro aki por a bira un realidad. Desde di comienso di Gabinete Wever-Croes Gobierno a pone e ser humano central y cu hechonan a bin ta demostra esaki. Vision di MEP ta dirigi riba mehoracion di cuido, inversion den cuido y trata mas paciente posibel na Aruba mes.

Sigur cu ImSan awor a bira un hospital ta un logro historico pa cuido medico na Aruba. Awor pariba di brug tambe tin su hospital. Si no tabata p’e pandemia y e exigencianan di Hulanda relaciona cu e fiansanan necesario pa por mantene cabes di nos pais riba awa, hopi mas por a keda logra.

Gobierno a inverti ya caba 62 miyon florin den e Centro di Radioterapia cu total lo crea 100 cupo di trabou y 1 miyon di florin den e 22 camanan aki riba menciona cu ta crea 11 cupo di trabou.

Un pabien na Staff y personal di ImSan, na Gabinete Wever-Croes principalmente Minister Dangui Oduber, cu hunto a traha duro p’esaki por a bira posibel. Sigur nos tur mester ta hopi orguyoso pa wak ImSan crece y asina tambe fortalece cuido y brinda un segundo pilar pa cuido di salud aki na Aruba y pa nos hendenan di pariba di brug.

MEP ta convenci cu di e manera aki tambe nos ta fomenta desaroyo na San Nicolas y poco poco nos por cuminsa tambe atrae turismo di salud pa Aruba. Un posibel pilar economico cu por trece desaroyo real pa San Nicolas, Shailiny Tromp-Lee a conclui.