Hopi partido politico luchando pa haya candidatonan pa subi lista

Compara cu eleccion di 2017, e campaña electoral pa eleccion 2021 cu lo tuma lugar na juni benidero, no ta bayendo cu asina hopi animo mirando cu desde cu Gabinete Wever Croes a dicidi di bay cas riba nan mes, e fecha  pa eleccion pa wordo adelanta cu tres luna.

Esaki a crea hopi inconvenencia pa partidonan politico, pero tambe pa politiconan cu tabata trahando pa busca material di propaganda for di exterior, pero awor ta confrontando un situacion serio cu tempo.

E factor tempo ta hungando un rol grandi awor, nos solamente pa loke t’e mensahe cu partidonan politico kier hiba na nan votadonan, pero tambe pa preparacion di esnan cu kier drenta e arena politico.

Loke mester a bira un proceso di seis luna, a wordo corta awor den un tempo sumamente cortico pa ehecuta plannan cu e organisacionnan politico tabatin pensa di haci.

Kisas e unico partido cu a kere cu e t’esun beneficia a p’e decision di Prome Minister Evelyn Wever Croes pa manda su Gobierno cas, esta su partido MEP, ya cu e pensa cu como partido den Gobierno, e lo por beneficia di henter un aparato publico pa plama su mensahe.

Sinembargo e partido aki tambe ta confrontando problemanan interno basta serio, cu hopi hende, tanto votadornan como sostenedornan, bandonando fila di e partido, pa tur loke a bin ta pasando, sigur ora cu e partido no a cumpli cu ningun promesa cu el a bira tur hende cu e lo haci  y lo ehecuta.

Awor cu pueblo sufriendo caba bastante p’e pandemia di Covid-19, partido MEP awor ta wordo confronta pa decisionnan tuma n’e mesun lider di e partido, den acuerdo cu el a firma cu Hulanda, entre otro entregando  autonomia financiero di e pais, reduccion di 60 miyon den cuido medido y reduccion salarial di trahadornan publico y di companianan estatal.

Decisionnan cu tur dia pueblo ta sinti e efectonan y pa colmo despues di a dicidi di manda su Gobierno cas, otro fabornan politico cu mester a wordo ehecuta prome cu eleccion, no por tuma lugar mas ya cu nan lo no tin base legal.

Esaki a pone cu hopi di hendenan cerca di e partido a dicidi di bira lomba pa MEP, ya cu e frustracion ta grandi y ta sigui crece dia pa dia, cu hopi hende conoci di e partido, rabia na e momentonan aki. Otro partidonan tambe tin problema pa yena nan lista cu candidatonan y atrobe lo mira cu algun partido lo entrega un lista cu candidato limita mescos pa eleccion 2017 ya cu no tin suficiente  persona mucho interesa pa drenta politica of pa bay campaña den un periodo di pandemia.