Medida di Prome Minister Evelyn Wever Croes pa reduci gasto medico ta impactando tur hende

Den practicaemente tur cas rond di Aruba, pueblo ta sinti e impacto grandi di kisas e medida mas inhumano cu Gobierno di partido MEP por a tuma, esta di reduci gasto di AZV cu 50 miyon pa luna loke ta nifica 60 miyon pa aña.

Cualkier gobernante cu un tiki sentimento di convivencia cu su pueblo, lo no a ni hinca e tipo di medida horendo aki den su mente, corda pa ehecuta  algo asina, cu tin miles di ciudadano desampara.

Hendenan cu ta acudiendo na nan dokter di cas, ta haya nan receta y ta bay botica pa busca e remedinan aki, ta wordo confronta na caha ora di paga, cu kisas ta solamente un di e remedinan so, nan por haya liber di pago y cu e otronan nan tin cu cubri e gastonan.

Pa colmo den e remedinan cu a dicidi cu no ta duna pueblo gratis mas, tin remedinan cu pueblo tin mester tur dia, manera hendenan cu ta sufri di stoma, hendenan cu ta sufri di ansiedad, hendenan cu ta sufri di tripa y awor ta wordo confronta cu nan tin cu paga p’e remedinan aki.

No ta husto, ya cu ta mesun pueblo aki, pa gran parti no tin entrada normal n’e momentonan aki, nan a perde gran parti di nan entrada y Prome Minister Evelyn Wever Croes tabata sa di esaki, pero a prefera di hunga grandi cu Hulanda, caminda su persona a sugeri na Gobierno di Reino, cu e lo introduci e medida aki cual lo evita cu e tin cu manda trahadornan cas.

Ta increibel pa lider di un pais, ta opta pa tuma medida asina drastico, caminda Gobierno ta hunga su salud di hende, cortando den remedinan necesario, p’asina no mester manda un grupo grandi di hendenan cu e Gobierno mes a nombra den servicio cas.

Informacion adkeri for di personal di boticanan, ta ser mustra cu tur dia tin hendenan ta zundra den botica ora cu nan wordo confronta cu e triste realidad aki, sorprendi totalmente ya cu nan no tabata na altura di e abuso aki y cu a aporta ainda mas grandi, na un situacion financiero cu ya caba nan ta pasando aden pa motibo di e pandemia cu e isla ta confronta cune.

Den bishita di politiconan na cas di votadornan, ta mesun kehonan ta bin dilanti, ta mesun  gritonan di angustia ya cu no ta tur hende tin suficiente poder financiero pa cumpra nan remedi, ya cu realmente nan no tin placa p’esaki.

Pa colmo e situacion ta bira ainda mas alarmante den futuro ora cu otro medida di Gabinete Wever Croes y Hulanda wordo introduci, esta e impuesto BTW caminda pueblo tin cu paga 16.5% na momento cu e cumpra algo y ta paga p’esaki na caha, loke lo haci e situacion financiero di pueblo, ainda mas delicado.

SALARIO              

Fuera di e asunto di remedi, mas y mas ta birando conoci cu otro decision di Prome Minister Evelyn Wever Croes pa mustra Hulanda cu su Gobierno ta bahando gasto di maneho y persona, ta ora cu su persona mes a infoma Hulanda cu e lo reduci salario di trahadornan publico cu 12.5%.

Na inicio Prome Minister Evelyn Wever Croes a sali bisa cu ta un decision impone pa Hulanda pero siman pasa ta bin sali na cla cu Gobierno Hulandes a confirma cu esaki ta otro idea di e Prome Minister di Aruba, cual ta mustra tambe e motibo di con ni na Corsou, Sint Maarten of Bonaire, e reduccion salario aki a wordo ehecuta.

Ta na Aruba so trahadornan publico mester a entrega salario, trahadornan di companianan estatal tambe mester a entrega salario algo cu no a sosode na ningun otro caminda loke ta confirma un biaha mas, cu Gabinete Wever Croes nunca tabatin e hende central, nunca a traha pa pueblo y nunca a percura pa pueblo progresa.