Pacto OM/EVELIN a keda confirma!

Cu e prome detencion den caso Avestrus (investigacion contra ex Minister Benny Sevinger) nos por conclui cu e pacto cu nos a premira desde caida di Gobierno ta uno real.
Ministerio Publico cu supuestamente mester ta un instituto imparcial un bez mas ta laga su mes wordo malusa p’asina afecta eleccion 2021.

Cu e detencion di repiente despues di casi dos aña di investigacion, 75 dia prome cu eleccion, no por keda observadornan politico nada otro cu conclui cu e pacto diabolico entre OM/MEP a keda realisa. Esaki simplemente pa purba stroba AVP pa gana den un forma abrumador eleccion di 25 juni benidero.

Pregunta un bes mas ta bay den direccion di e PG nobo, esaki ta husticia? Con por ta posibel cu OM ta laga su mes wordo usa asina aki politicamente?

Diadomingo den oranan di anochi a drenta noticia di detencion di e hoben R.R den e caso Avestrus. Siman pasa nos redaccion a publica un articulo cu a hiba como titulo: OM mester keda un instituto imparcial politicamente. Cu Gobierno a cay 6 luna prome cu tempo pa un supuesto “redflag” di un stichting, a trece bastante duda.

Den e articulo a menciona cu ya caba OM no ta carga e respet mas den comunidad y cu tin un vergroot glas riba nan. Wel cu e paso aki di Ministerio Publico nos observadornan politico a haya rason. Tur cos ta indica cu e Pacto OM/Evelin ta uno real!

Despues di dos aña di investigacion, net den porta di eleccion bo ta bay cuminsa detene hende? Esaki ta atrobe un strategia politico y diabolico pa afecta eleccion.

Ayera un di dos persona a keda deteni, esta Jeff Franken, campañador of ex di Glenbert Croes. Por spera mas detencion pa trece claridad den e caso Avestruz pa sigui cu e caso Flamingo.