Pone ‘fever’ ku droga i arma den outo ku polis a para

WILLEMSTAD – Djadumingu 11 di aprel 2021 alrededor di 12.25’or, un unidat polisial a tuma nota di shofùr di un vehíkulo ku tabata pone ‘fever’ den Montaña Abou.

E unidat a duna e shofùr òrdu pa para, pero esaki a sigui kore i bai stashoná e vehíkulo den kurá di un kas den Kaya Berom, pa despues baha bai paden.

Mesora e unidat a pidi refuerso i a rondoná e bibienda aki. E Polisnan atento a tuma nota ku djis despues e shofùr a sali di porta di patras di e kas i mesora nan a detené.

Den un tas ku e tabatin, a bin topa kasi 1 kilo di mariwana, 9 bala skèrpi kaliber 22, 15 bala skèrpi kaliber 45 i 18 di kaliber 38. Despues a tene un entrada hudisial n’e kas aki i a konfiská algun planchi di mariwana i un pistol di airsoft.

Mesora a detene e hòmber sospechoso S.C.J. nase na Kòrsou en konekshon ku violashon di lei di arma di kandela i lei di opio.

Durante di e entrada hudisial a detené tambe e hòmber sospechoso C.M.V. di 20 aña nase na Kòrsou pa e hechonan ariba menshoná i tambe pa menasa i insulto di agentenan polisial. A presentá ambos sospechoso dilanti di un Fiskal ouksiliar ku a ordená nan enkarselashon pendiente di mas investigashon.