Aunke salubridad ta den ICU, Gobierno sin curason ta corta den cuido

Desde maart 2020 e virus Covid-19 a bati na porta di nos ciudadanonan. Nos tin ya caba 10.076  caso positivo. Activo tin 516 caso y caso nobo ta 26. Tin 92 persona cu a fayece pa motibo di e virus aki. Alabes tin un cantidad di persona den ICU. Aruba su Hospital ta yudando pashentnan di Corsou y e otro islanan den Reino.

Sinembargo e forma con Gobierno a bin ta atende cu e crisis aki a haci cu hopi di nos hendenan ta duda si nan ta vacuna si of no y esaki tin su impacto con liher nos pais lo bay recupera riba tereno economico, financiero y social.

Wyatt-Ras ta kere cu Covid-19 a ocasiona problemanan devastador, no solamente ora un persona tin e virus sino a largo plaso tambe. E tin consecuencianan duradero pa salud di nos ciudadanonan pa loke ta trata pulmon, pero tambe pa loke ta trata otro organonan cu ta ser “aangetast” door e virus aki.

Esaki sigur mester tene cuenta cun’e. Pesey ta importante pa nos hendenan ta vacuna. Especialmente esnan di edadnan mas halto y esnan cu tin malesanan cronico.

Wyatt-Ras a trece na varios ocasion padilanti cu Gobierno mester percura cu e vacuna ta ser duna n’e gruponan di risico mas serca di cas posibel. Pero Gobierno a scohe pa, den un fase tempran, duna vacuna na “friends and family”. Aki Wyatt-Ras no kiermen e celebridadnan cu a haya vacuna den comienso, sino ora a vacuna famia y amigonan di e partidonan na mando. Esey a haci cu hopi hende ta bisa cu si ta “friends and family” ta vacuna e ora nan no tin cu vacuna mas. Esey ta loke mester cambia. Mester bay mas serca di e personanan aki. Tin hopi forma. Wyatt-Ras a sugeri via di dokternan di cas, pero tambe nos tabatin bus di salud, cu tabata proyecto di Gabinete Eman y e no ta wordo usa.

E bus di salud tambe por bay n’e diferente barionan y ta haci mas posibel cu nos hendenan por bay mas serca di cas pa por ser vacuna.

Pa miedo di contagio tin hende no kier bai den un sporthal pa registra y e drempel e ora ta halto pa vacuna.

Mientras cu nos salubridad publico ta enfrentando un reto grandi, e Gobierno sin curason aki ta tuma medidanan drastico den nos cuido. Esey ta touch full e sector di cuido. Por menciona e medida cu e lista positivo di remedinan a baha cu 80 remedi. Esaki ta haci cu nos hendenan humilde, hendenan cu no tin empleo y hendenan cu no tin un forma di biba, mester bay paga pa nan medicina y mester paga un Pharmacist Fee ora nan haya medicina.

Esaki no ta un situacion corecto. Tambe a corta den djente falso cu especialmente nos grandinan por a bin na remarca pa haya y tambe a stop e transporte pa dialyse, mientras a coloca campañadornan di Minister pa haci e trabou aki pa despues coloca nan den Gobierno bao departamentonan cu ta cay bao salubridad, Wyatt-Ras a haci diferente pregunta y no a haya contesta for di e Minister encarga cu Salubridad.

Ta momento p’e Minister refleha y bin cu mihor formanan pa atende cu cuido di salud di nos hendenan. 

E Minister aki solamente na momento cu e tin asuntonan cu e kier gaba cun’e e ta bin padilanti. P.e. hasta den cierto medio di comunicacion ora bo kier drenta pa lesa algo, mester keda click riba dje pa bo por habri e pagina. E minister aki ta haci propaganda. Kizas no cu su propio placa, sino cu placa di pueblo.

Segun Wyatt-Ras nos mester mantene cuido di calidad. Un cuido cu AVP su Gobierno a contribui na dje pa garantisa cu mayan cu na momento cu no tin Covid mas por keda atende cu pashentnan cu keda cu consecuencianan di largo duracion.