Ministerio Publico a acelera investigacion caso Avestruz, despues cu Prome Minister Evelyn Wever Croes a baha Gobierno

Ayera tardi durante di un conferencia di prensa, tanto lider di partido AVP, mr. Mike Eman como Parlamentario Benny Sevinger, a cuestiona grandemente e rol cu Ministerio Publico ta insisti pa hunga den otro proceso electoral cu lo tuma lugar na luna di juni benidero.

AWEMainta ya caba na varios ocasion a cuestiona e forma di procede di Ministerio Publico den e arena politico y awor sin duda e instituto aki ta dunando e impersion cu e lo trata di influencia eleccion di dia 25 di juni benidero mescos cu el a haci den eleccion di 2017 cu e caso di Paul Croes.

Ayera tardi Benny Sevinger a presenta dos carta cu ta bisa hopi di e mentalidad politico di Ministerio Publico, influencia of no pa politiconan di MEP y di Gobierno demisionario, pero tin cosnan cu ta tumando lugar, cu simplemente ta confirma e dudanan aki.

Benny Sevinger a mustra riba un proceso contra di su persona, cu a lanta cu bishita di tres miembro di fraccion di MEP, esta Rocco Tjon, Endy Croes y Edgar Vrolijk, kendenan no solamente a bay Ministerio Publico cu kehonan contra di su persona, pero tambe despues a dirigi carta pa Tweede Kamer na Hulanda, pa haya ayudo di expertonan di ley Hulandes p’asina nan bin atende cu e caso contra di nan rival politico.

Na 2018 autoridadnan di Landsrecherche y Ministerio Publico a drenta cas di e politico aki y a bay cu cantidad di material, tanto documento como informacionnan digital pa bay analisa y busca sin tin cosnan contra regla cu a wordo haci.

Mirando cu eleccion 2021 ta yegando cerca, tanto Benny Sevinger como partido AVP tabata desea di haya informacion for di Ministerio Publico pa sa ki decision nan lo tuma p’asina e asunto aki no tin cu cay den tempo di campaña y prome cu eleccion manera a sosode cu Paul Croes.

Den un carta fecha 11 di Maart 2021, abogado David Kock na nomber di su cliente Benny Sevinger, a pidi Ministerio Publico pa duna claridad riba e investigacion contra di su persona mirando cu a pasa 17 luna y sr. Sevinger ta bibando den incertidumbre di kico lo bay pasa y si e lo wordo deteni of no.

A pidi Ministerio Publico pa duna informacion riba e investigacion caminda nan por informa e sospechoso si a haya cosnan castigabel y si esaki t’e caso cuminsa cu e procedora normal of de lo contrario termina cu e investigacion contra di su persona.

Tur esaki relaciona cu e proceso electoral cu mester a tuma lugar na luna di september 2021 y riba e carta aki Ministerio Publico a reacciona mesora, entre otro mustrando cu pa motibo di hopi trabou y tambe e asunto di pandemia cu a asota e isla, e proceso ta tardando, pero cu n’e alturanan ey, esta luna di maart ultimo, no tin ningun cargo oficial contra di cliente di abogado Kock.

A pidi Ministerio Publico un contesta prome cu dia 25 di maart y si esaki no t’e caso ta intencion pa Benny Sevinger entama un caso contra di entidad aki y busca un decision di Hues riba tur loke a bin ta tumando lugar.

Ministerio Publico a reacciona den un carta fecha 17 di maart mes, pues un siman despues cu abogado Kock a dirigi su carta y den e carta aki ta ser mustra cu te ainda no tin ningun carga oficial penal contra di Benny Sevinger ya cu e proceso ta andando, pero Landsrecherche lo tin cu papia cu testigonan, interoga mas sospechoso, pero a enfatisa cu un eventual motibo pa acusa y persigui Benny Sevinger, lo no keda cla prome cu luna di september 2021.

Esaki a wordo anuncia siman pasa caba den algun medio di comunicacion, pero awor di repiente, ata Ministerio Publico, despues cu Prome Minister Evelyn Wever Croes a baha su Gobierno y a anuncia eleccion pa dia 25 di juni, e scenario politico a cambia y di repiente Ministerio Publico a cuminsa cu e mesun wega politico cu na 2017.

Ta mas cu claro cu comunidad ta haya duda den integridad di Ministerio Publico, ya cu e ultimo accionnan pa detene tres persona como parti di e investigacion den e caso aki, ta mustra cu algun caminda ordo lo por a yega pa acelera e proceso contra Benny, sigura mirando cu partidonan cu e forma coalicion, no tin argumento pa drenta cas di hende pa hiba un campaña pa re-eleccion.

Ta tristo ora un entidad asina importante ta hunga cu su reputacion di e forma aki, permitiendo su mes di bira un instrumento politico sin cu esaki ta necesario.