Polis a demandá Gobiernu maske no a baha su salario

WILLEMSTAD – Un kaso tipiko di “karga awa den makutu…” of manera makamba ta bisa “…water naar de zee dragen… ta loke un Polis ku a haña un kondena di prizon kondishonal a hasi, pasobra e medida disciplinario no a perhudiké absolutamente den su salario  di fin di luna, pero asina mes el a hiba Gobiernu Corte dos biaha te ku Korte a konklui ku resultado dje kaso no ta karni ni piská, pasobra e no a produsi ni benefisio ¡ ni perwisio.

E uniko perwisio ku e por a sinti ta e hecho ku e mester a paga abogado, pasobra esei sí Gobiernu no ta paga pe i tampoko a kobr’é pa uso di abogado pa representá Gobiernu.

Korte di Hustisia a yega na konklushon ku e Polis no tabatin nada di gana ku e prosesonan aki, pasobra na momento ku a bah’é di rango di Hoofdagent pa agente ya kaba el a bira hoofdagent atrobe.

E kaso a bin dilanti den Korte di Hustisia dia 18 di maart i dos siman despues e tribunal a dikta nan veredikto simpel.

E tribunal a splika ku e Polis tabata envolvi den insidente bou di ora di trabou dos biaha dia 27 di september 2015 i atrobe dia 10 di october dje mesun aña.

Pe mal komportashon aki Corte den promé instansia  na Kòrsou  a kondené na un kastigu di prizon di seis luna kondishonal ku e no mester a sinta i un periodo di prueba di 3 aña i 240 ora di trabou fòrsá plus paga daño perwisio.

Teniendo un rekòrt asina dia 30 di ougustus el a faya ku su deber  i Korte di amtenar a bah’é di rango di Hoofdagent pa Agente pero no a mishi ku su salario.

Despues di un aña el a haña su rango di Hoofdagent bèk. Kualke hende lo a bisa “Caso Cerrado” pero no e Polis aki pasobra el a sigi apelá.

Dado momento Korte di Hustisia mes a puntra ta ki sentido tin pa e sigi prosedé, pasobra e no ta bai atras ni dilanti i pa papia di kuestion di prinsipio no ta motibu pa hiba un proseso den Korte di Hustisia.

El a pretende ku durante e periodo ku e tabata agente bèk, el a keda firma verbal i su ‘epauletnan’  komo Hoofdagent loke por resultá den represaya.

Pero loke mas a molestiá e Polis ta ku nan no ta yam’é pa forma parti di Team di Aresto. Pa Hues esei no tabata motibu pa dikta veredikto i nan a deklará ku su apelashon no ta atmisibel.