Ricardo Croes a parti sla contra MEP den su conferencia di prensa

Durante e conferencia di prensa di RED Democratico, su lider Ricardo Croes a parti sla tur rond. No solamente partido di e Gobiernonan anterior a haya sla y critica, pero hasta su mesun partner den e actual gobernacion.

“Corupcion a caba cu tur pais na mundo,” el a bisa den su introduccion. E unico cu a haya elogio tabata e Minister cu a representa su partido den e gobernacion kende, el a bisa, a hiba un maneho cu tur humildad y buscando respet pa placa di pueblo. Inclusivo no a haci uzo di e auto di luho cu e por a core den dje.

El a pone bon cla cu pueblo mester dicidi awor si nan kier pa sigui cu un maneho unda ta respeta pueblo su placa y combati corupcion, enbes di vota p’esnan cu ta mishi cu patrimonio di pueblo. El a hasta pidi pa bay un tiki mas leu di entrega bek na pueblo tur loke a wordo horta for di nan.

“Nos ta condena e actonan di corupcion cu a wordo cometi den e pais aki pa añas y nos ta spera cu husticia prevalence. Si pueblo kier caba cu corupcion, mester realisa ta cual t’e partidonan cu ta comete e actonan aki.

Hopi wega politico ta wordo hunga, leynan ta wordo kibra y trapa y e pais ta paga p’e.”

El a papia di e programa di gobernacion di cual un parti no a wordo realisa, pa cual nan mester haya e chens pa sigui y finalisa esaki. Un di nan t’e ley di Cannabis cu ta un industria basta grandi. Algo cu no a mira luz di dia.

Un Gobierno nobo cu RED formando parti di esaki lo tin e punto aki sigur den e programa di gobernacion pa introducie mas liher posibel y no manera a sosode aworaki. El a papia di produccion di awa y coriente, uzando recursonan natural manera awa di lama; sector primario cu no a logra cambio pa trece mehoracion p’e cunukero of piscadornan, “cu excepcion di e dos of mas piscadornan cu a haya permiso pa spearfishing>”

Croes a bisa cu e no ta di acuerdo cu e expresion di Minister President cu a pidi sorry cu no a cumpli cu tur aspecto di programa di gobernacion. Ricardo Croes no ta haya necesario pidi disculpa pasobra el a haci su trabou debidamente. Y su Minister tampoco.

Ta pidi disculpa ora of si a faya. Si a tene cuenta cu e visionnan di RED y a ehecuta nan, ya cu nan ta den acuerdo di gobernacion, no mester a pidi dispensa. Ya cu no a considera nada di partido RED Democratico, djis wak e reunionnan kende a cumpli. 

Pueblo a haya su fastball for di e partido mas grandi di coalicion. Y pueblo mester saca su mesun conclusion. Partido RED tabata e di diesdos asiento di cual 11 tabata suficiente. Despues di esey cos a cambia un poco pasobra tabata depende di tur tres partido pa goberna,” Ricardo Croes a bisa.