Accion 21 a lansa 3 candidato fuerte cu ta cla pa sirbi e pais Aruba!

Accion-21 ta un partido liber progresivo cu ta kere den un aparato gubernamental eficiente, transparente y honesto. Nan kier trece un cambio den e sistema antigua di politica tradicional cu ya pa 20 aña a trece cu ne impactonan negativo pa comunidad humilde di Aruba.

Aruba no kier scucha promesanan di campaña cu nunca ta wordo cumpli. Aruba no kier p’e clase rico sigui bira mas rico y e pober keda bira mas pober. Aruba no kier wak su muchanan sigui wordo abusa sin ningun proteccion. Aruba kier y ta cla pa un cambio cu lo trece solucion berdadero pa nos hende y pais.

Cu hopi orguyo nos ta lansa nos tres candidatonan:

Edmar Gietel ta para pa combati e problematica grandi di abuso y inhusticia cu ta eherce na Aruba y ta para firme pa bienestar di nos hendenan.  Como tata Edmar a experiencia e abuso y inhusticia di nos sistema actual y a dicidí di tuma e reto pa forma parti di partido liberal y progresivo Accion-21 p’asina trece cambio di berdad, paso nos tur como Arubiano merece e mihor.

Flora Petronilia ta para pa igualdad di hende homber y hende muher y ta kere den un isla prospero pa nos tur como Arubiano. Flora a dicidi di tuma e reto den policita dor di scoge pa forma parti di partido Accion-21 pasobra e kier enfoka pa trece cambio den e sistema pa trato husto, etico y legal pa nos hendenan den sector laboral. [1] 

Gerald Vingal ta para pa trece cambio den nos principionan di gobernacion cu no ta ancra na sistema di politica tradicional y ta kere den e reformacion gubernamental p’e bienestar di nos pais. Gerald ta forma parti di Accion-21 p’asina e por forma parti di e solucion pa actualisa y moderniza e aparato di nos sribidornan publico.

Awor t’e momento pa tuma accion. Accion pa revitalisa nos economia, accion pa sanea nos finansa, accion pa alivia e crisis social, accion pa reforma nos sistema gubernamental, accion pa sigui desaroya nos sistema di enseñansa, accion pa intesifica cuido preventivo den salubridad publico y accion pa enfoka riba sostenibilidad pa salbaguardia nos medio ambiente.

Ban kibra nos ciclonan vicioso y recupera un gobernacion confiabel. Hunto, esaki y hopi mas ta posibel. Solucion ta bin ora cu bo tuma Accion!