Alan Howell a hiba su ‘administratie’ pa Landsrecherche

Ayera merdia e lider di partido POR, sr. Alan Howell, a presenta na oficina di Landsrecherche na Vondellaan, loke el a haci riba boluntad propio, relaciona cu e investigacion andando relaciona cu fondonan di e fundacion di su fraccion den Parlamento, pa loke ta su fraktiemedewerker.

Howell a atende e reunion  aki, ya cu no tabatin nada di haber cu interogacion of detencion, pero hunto cu su abogado mr. Marchena, el a solicita un reunion y esaki a wordo acepta pa autoridadnan.

Mucho e lider di POR no tabatin di bisa ora cu el a sali for di e reunion, mustrando cu di su parti e kier a haci entrega documentonan di loke tabata su administratie cu e fraccion a hiba den cual posiblemente e lo a mustra di con tabatin transaccion di placa pa su cuenta.

AWEMainta tin informacion cu hopi gasto cu a wordo haci p’e fraccion funciona, su persona lo tabata cubri esaki personalmente y cu despues e lo ta manda cobra e fundacion cu ta pasa e fondo aki pa su cuenta,

Alan Howell a bolbe insisti cu no tin nada malo of contra regla den henter e asunto aki, pero si e ta mira cu ‘nan’ a busca un excuus pa baha Gobierno, ya cu tabatin otro motibonan tras di e decision di manda Gobierno cas.

AWEMainta a informa caba cu e lider di POR no tabata sa mes cu Prome Minister Evelyn Wever Croes a bishita Gobernador pa entrega retiro di su Gobierno y ta pa medionan di comunicacion el a bin haya sa di esaki y awor ta insisti mescos cu el a haci for di prome dia caba, cu su persona no por t’e motibo  cu a baha Gobierno y cu e berdad lo sali na cla pronto.

Howell a priminti cu na su debido tempo e lo bin dilanti y informa pueblo e motibo real cu Prome Minister a dicidi di manda su Gobierno cas ya cu di parti di su partido y su persona, no tin nada incorecto ningun momento.

E lider politico a mustra cu su partido ta creciendo dia pa dia y e sosten cu e ta ricibi ta tremendo hasta sigurando cu e ta kere cu POR lo saca dos asiento y kisas hasta tres asiento den e eleccion di juni.