Amor pa pueblo di Aruba

Pa: Eric RAS, Partido Curpa

A busca un argumento fofo pa a tira Gobierno di Aruba abao. Segun informacion e asunto di Howell di POR lo tabatin mas cu 3 luna caba andando. Diripiente ora Ministerio Publico a trece e noticia den publicidad cu a pone beslag riba cuenta di partido POR Gobierno a cai. Si Gobierno mester a cai anto esaki mester sosode den 2020 caminda cu supuestamente lo tabatin mas cu un Minister casonan di fraude. Dicon no ta bisa cu un siman prome cu 30 di maart 2021 a firma e acuerdo di implementacion di e siguiente landspakket?

Un cos cu pueblo no mester sera su wowonan pe, t’e landspakket cu a drenta na vigor. Fuera di a corta den AZV awor pueblo mester contribui pa su remedinan tambe. Nos ta den un crisis y nos tin un Gobierno cu ta stima pueblo di Aruba asina tanto cu a dicidi di sacrifica su pueblo pa baha gastonan den salubridad den un tempo di necesidad. Den un pandemia caminda parse cu e salud di e pueblo Arubano no ta uno importante.

Si pueblo su salud tabata importante lo no a baha gasto di AZV mucho menos di regala Citgo 250 miyon di dolar y mester a fia mas 1 biyon florin di Hulanda. Un compania cu na 2019  tabatin un bon ganashi cu por a paga 250 miyon di dolar, cual ta e cifra corecto segun informacion cu mi a ricibi, sin ningun problema.

A kita Director di RdA y mester a pagu’e 2.6 miyon p’e bai. Si tin iregularidad cu a sosode den RdA mester a entrega un keho y no regala placa di pueblo pa haci malo. Ta kibra contract cu Directornan di AZV, Ultilities y Elmar y ta paga nan pa nan bai.  Asina ta malversa placa di pueblo y kier papia di integridad. Pa haci malo ta dunabo un golden handshake pa bo bai. Si t’e homber chiquito si bo kier laga sere.

Ya cu e bala a cuminsa lora den e partido berde, Ministerio Publico mester cuminsa laga e bala lora tambe den e Gobierno demisionario paso eyden tambe nombernan a cai pa corupcion. Ministerio Publico mester keda consecuente pa no trece un desbalance den e resultado di e eleccion di 25 di juni 2021.

Pa Hulanda sigur ta mas facil pa sigui deal cu e partido geel, pasobra bo no ta bai renegocia COHO unabez cu bo a bai di acuerdo caba cu e negociacion y a firma pa entrega autonomia dia 13 di november 2020. Locual cu ta keda t’e implementacion di e landspakketnan riba tereno di husticia, salubridad, educacion y finanza.

Esaki t’e opportunidad pa pueblo trece un cambio den e resultado den e eleccion di dia 25 di juni 2021. Laga e votamento di pueblo di Curacao ta un ehemple pa trece un cambio den resultado di eleccion. Pa trece un cambio y un aire fresco riba Aruba, Partido Curpa t’e alternativa den e proximo eleccion.