Den luna di maart Aruba a ricibi 48.967 turista. Prome kwartaal 2021 cu grado di recuperacion di 49% versus 2020

A.T.A. ta desea pa informa nos comunidad di e situacion actual pa loke ta trata e industria turistico, conforme informacion compila n’e momentonan aki.

TURISMO ‘STAY-OVER’

Durante luna di maart 2021 nos isla a yama bon-bini na un total di 48.967 bishitante ‘stay-over’. Di e bishitantenan aki, 43.464 tabata procedente di Norte America y 2.538 tabata procedente for di diferente pais Europeo. 1.895 Bishitante tabata procedente di Latino America y 1.070 bishitante di otro pais/islanan den region.

HOTELNAN/AHATA

Segun Aruba Hotel and Tourism Association, na maart 2021, e ‘Average Daily Rate’ (ADR) a baha cu 15.5% compara cu e mesun luna na 2020. Esaki den cifra ta US$ 239.32 na 2020 compara cu US$ 278.23 pa 2021.

E entrada pa kamber disponibel, e asina yama RevPAR a baha cu 25.9% di US$ 136.71 na 2020 pa US$ 101.35 na 2021. E ocupacion den nos hotelnan a baha cu 12.2% compara cu maart 2020 (e lockdown debi n’e pandemia di Covid a inicia dia 17 di maart 2020), e occupancy pa maart 2021 tabata 36.4%.

E cifranan di AHATA ta basa riba 19 propiedadnan y 6 timeshare hotels, cual ta mayoria di e hotelnan cu excepcion di Hilton Aruba Caribbean Resort & Casino.

TURISMO CRUCERO

E industria di crucero a paralisa desde inicio di e pandemia. Anuncio cu a wordo haci recientemente ta cu Aruba ta den e itinerarionan di parti di Celebrity Cruise Lines cu lo re-inicia servicio entrante juni awor. Sinembargo ainda no tin fecha concreto riba re-inicio di operacion den e region di Caribe.

Ta bon pa recorda cu e industria di crucero ta pendiente pa CDC (Centers for Disease Control and Prevention) aproba e recomendacion di e protocolnan relaciona cu Covid-19 pa barconan di crucero.

E situacion di e barconan cu por mira staciona den nos waf ta un asina yama ‘warm lay-up’ cual kiermen cu e barco ta riba un standby, wardando riba instruccion na momento cu operacionnan re-inicia. E actividad aki ta produci cierto entrada pa nos economia entre otro unda e barconan ta abastece nan productonan localmente. No tin turista riba e barconan, pero solamente e minimo na tripulante (skeleton crew) y nan mester cumpli estrictamente cu tur protocol local y internacional pa loke t’e pandemia actual.

KICO POR SPERA PA E RESTO DI 2021?

Basa riba diferente desaroyo actual y tambe analisisnan pa loke ta trata e transporte aereo, ta observa e forecast p’e di dos kwartaal. E proyecionnan ta mustra un crecemento di entre 15% pa 37% compara cu e prome kwartaal di 2021 durante cual A.T.A. a ricibi un total di 112,317 turista.

E proyeccion revisa ta brinda indicacion cu Aruba lo por ta serando 2021 conforme e scenario ‘cautelosamente optimista’ (recuperacion vs. 2019: 55%) na lugar di e scenario ‘conservativo’ (recuperacion vs. 2019: 45%).

Ora compara prome kwartaal di 2021 cu kwartaal 1 di 2020, esaki ta mustra un grado di recuperacion di 49%. Y si compara esaki cu kwartaal 1 di 2019, e grado di locual a recupera den kwartaal 1 di 2021 ta di 38%.

TOURISM CREDITS / CENTRAL BANK OF ARUBA

Di acuerdo cu Banco Central e asina yama ‘Tourism Credits’ (cual anteriomente tabata wordo yama ‘Tourism Receipts’) p’e prome 9 luna di aña 2020 a contribui cu AWG 1431.1 miyon den nos economia, cu ta 48.5% menos compara cu e mesun temporada na 2019.

Esaki naturalmente ta debi n’e pandemia global di Covid-19 unda Aruba tambe a sera su fronteranan temporalmente cual a inicia na luna di maart 2020 te cu juli 2020.

Mescos cu otro destinacionnan, nos isla ta pasando den momentonan di reto pa loke ta trata e pandemia aki.

Pa mantene nos mes na e protocolnan estableci dor di diferente instancia ta di sumo importancia p’asina baha e cantidad di casonan positivo di Covid-19 den nos comunidad. Corda cu e bienestar di nos cada un ciudadano y nos bishitantenan, ta importante y teniendo nos mes na protocolnan estableci, ta contribui na recuperacion mas liher di nos economia. Hunto nos lo vence y nos isla y su turismo lo sigui florece.